Жыл сайын қоршаған ортаны қорғау мақсатында өңірде елді мекендерді жасыл желекпен көмкеру тұрақты түрде жүргізіліп жатыр. Мақсаты – экологиялық мәдениетті қалыптастыру және тұрғындарды қоршаған ортаны ластамауға, тазалық сақтауға бағытталған.
Облыс орталығының айналасынан жасыл желекті қорған құру және Мемлекет басшысының мемлекеттік орман қоры аумағында 2 млрд. түп әртүрлі ағаш көшеттерін отырғызу тапсырмасы аясында жұмыс жүріп жатыр. Осы бағытта облыс бойынша 5 жылда 110 210 гектар жерге 170 млн. түп ағаш көшетін отырғызу кешенді жоспарына қоса Түркістан қаласының «Жасыл белдеуіне» қосымша тағы 6400 гектар аймаққа көшеттер егу жоспарланған.
Биыл облыста кешенді жоспарға сәйкес, мемлекеттік орман қоры жерлерінде 20 300 гектар жерге 32214,23 мың түп көшет отырғызу жоспарланған. Бүгінгі таңда 1310 гектар жерге 2339,6 мың түп көшет егілген. Өткен жылғы мәдени орман алқаптарын толықтыруға 2161,2 мың көшет босатылды.
Түркістан қаласының экологиялық ахуалын жақсарту үшін «Жасыл аймақ», «Жасыл белдеу» жобалары аясында ауқымды жұмыстар атқарылып жатыр. Мәселен, биыл қала аумағында 210 000 дана бір жылдық және көп жылдық гүлдер егу жоспарланған. Оның 60 000 данасы егілді. Қалғанын осы айдың соңына дейін отырғызу көзделуде. Облыс орталығына 17 түрлі бейімделген 249 000 түп ағаш көшетін (көктем мезгілінде 100 000 дана, күз маусымында 149 000 дана) егу жоспарланып отыр. Биыл көктемде жасыл белдеуде тек толықтыру жұмыстары атқарылады.
Түркістан қаласын көгалдандыру үшін қажетті көшеттермен қамтамасыз ету мақсатында «Жасыл аймақ» КММ-інде 120 гектар жерде орман тұқымбағы қолға алынды. Ол жерде қазір 3,5 млн түп көшет өсірілуде. Бүгінгі таңда орман тұқымбақтарының көлемі екі есеге ұлғайып, 356 гектарға жетті. Онда әр жылы 35,0 – 40,0 млн. әртүрлі ағаш көшеттерін өсіру қолға алынады.
Ағаш отырғызу, оны күтіп-баптау, қорғау жұмыстары тоқтамайды. Қазіргі таңда аймақта
3 млн. 144 мың гектар орманды дала алқабы бар. Оның ішінде орманмен көмкерілген алқап
1 млн. 517,15 мың гектарға жетті. Сонымен қатар «Жасыл белдеу» аумағындағы 5400 гектар алқапқа «Қазатомпром» АҚ жапырақты өсімдіктер мен сексеуіл көшеттерін екті. Оның жалпы көлемі 11010 гектарды құрады. Қазіргі таңда бұл жұмыстар жалғасуда. Соның нәтижесінде «Жасыл белдеудің» көлемі 20 000 гектарға жетеді деп көзделіп отыр.
Мамандар тұрғындарға әр аулаға тал егу, бұлақ көздерін ашып, тазалық жұмыстарын жүргізуге, табиғатқа жанашырлық жасауға өз үлестерін қосуға шақырады.
Айта кетейік, облыстық табиғи ресурстар және табиғат пайдалануды реттеу басқармасына қарасты мекемелердің тұқымбақтарында 27 миллионнан астам түрлі ағаш-бұта көшеттері күтіп-бапталуда.
