Жасың келіп, зейнеткерлікке шыққан соң баяғы өмірдің екпінімен бір-екі жылдың қалай өтіп кеткенін байқамай қаласың. Кейін бірте-бірте өзіңді көштен қалып бара жатқандай сезінеді екенсің. Дегенмен, көпшілікке араласып қалған адам өмірдің ағымын байқап, елге жақсылық жасап жатқан азаматтарды көріп, олардың халыққа еткен еңбегін бағалап, жүзін жарық етуді өзіне парыз санап тұрады екен.
Аллаға шүкір, ары таза, жүрегі кең, бойына ата-бабаларымыздың қасиеті қонған азаматтар арамызда аз емес. Солардың бірі – Жарылқасын Мелдешов. Жақаң Келес ауданы, Жүзімдік елді мекенінің тумасы. Ол мектеп бітірген соң Алматы медициналық институтына оқуға түсіп, 1975 жылы оны хирург мамандығы бойынша бітіріп шықты. Бірінші санаттағы дәрігер-хирург білімін жетілдіру институттарында оқып, қосымша мамандық игерді.
Адам денсаулығы оның жеке басына ғана қажет десек, қателесеміз. Оның денінің сау болғаны ең бірінші кезекте қоғамға керек. Дертіне дауа іздеп келген науқастың қас-қабағына қарап, ем-домын жасап жүрген ақ желеңділер жер бетінің қай түкпірінде болса да құрметке бөленетіні содан.
Жарылқасын Мелдешов 1976 жылдан Сарыағаш аудандық медицина мекемелерін басқарды. 2000-2006 жылдары аудандық денсаулық сақтау бөлімінің меңгерушісі қызметін абыроймен атқарып, қажырлы еңбегі үшін бірнеше рет ҚР Денсаулық сақтау министрлігінің, облыстық медицина басқармасының Құрмет грамоталарымен марапатталды.
Зейнеткерлікке шыққаннан соң Ол Сарыағаш қаласынан жекеменшік үй сатып алып, үлкен төрт қабатты үйдің құрылысын бастап жіберді. Денсаулық сақтау министрлігінде жауапты қызмет атқарған Дүйсебай Жаңабаев оған көмек қолын созды. Ол кісімен ақылдасып, жұмысты неден бастау керек, қаржы, кадр мәселесі, дәрі-дәрмек, қажетті құрал-жабдықтар, тағы басқа мәселелерді оңтайлы шешті. Біраз ізденістің, әрі-бері тынбай жүгірудің арқасында «Нұрболат» өндірістік медицина орталығы ашылды. Әрине, бастапқыда жағдай қиын еді. Керекті құрал-жабдықтар жоқ, маман-дәрігерлердің өзі жұмысқа ойланып кірісетін. Басында 5-6 пациентпен жұмыс бастады. Кейін заманауи медициналық аппараттар сатып алды. Осылайша орталыққа адамдар көптеп келетін болды. Кабинеттерді көбейтті. Емделушілер жататын орындарды ұлғайтты.
Күндердің күнінде үлкен төрт қабатты орталыққа қосымша ғимарат қосты. Жақын жерден науқастарды қарайтын үй сатып алды. «Нұрболат» медициналық орталығы қазіргі таңда 29 202 пациентке қызмет көрсетеді.
Ғимаратта терапевтік және хирургиялық профильдердің (екі ота жасау бөлмесі, жансақтау бөлмесі, күндізгі стационар) қызметі көрсетіледі. Медицина орталығында қазіргі уақытта 152 төсекті аурухана (оның 50-і хирургиялық, 92-сі терапевтік, 10-ы ақылы) 250 келушіге арналған емхана, жылжымалы жедел жәрдем бөлімшесі қызмет етеді.
Ұжымда 37 адамнан тұратын арнайы көмек көрсететін мамандар (кардиолог, реаниматолог, невропатолог, пульмонолог, эндокринолог, нарколог, педиатр, инфекционист, дерматолог, хирург, травматолог, гинеколог, уролог, офтальмолог, стоматолог, тағы басқа) жұмыс істейді.
Құрал-жабдықтарға келер болсақ, мұнда төртінші буын аппараттар бар, 3 УЗИ кабинеті, флюро, ЭКГ, Хольтер, СМА спирографы бар сандық рентген аппараты жұмыс істейді. КДО-да биохимиялық және бактериялық зертхана бар. ИФА талдауының барлық түрлері жүргізіледі. Сондай-ақ, жаттығу терапиясы, массаж, физиотерапиялық процедур-парафин, UNF кварц, мавит, тағы басқа бөлімдер бар. Компьютерлік парк 100-ден астам жұмыс орындарынан тұрады. Damumed жүйесіне қосылған.
«Нұрболат» медициналық орталығын жергілікті жұрт «Азиямед» деп атап кеткен. Бұл орталықта жалпы саны 173 адам қызмет атқаруда. Олардың 51-і жоғары санаттағы, медицина саласында қызмет еткен, арнайы шақыртылған жоғары санатты мамандар, 87-сі медбикелер.
Асылбек ИСМАЙЛБЕКОВ.Сарыағаш қаласы.
