Бүгін ҚР Мәжіліс депутаты, «AMANAT» партиясы фракциясының мүшесі Берік Бекжанов, партияның Еңбекші аудандық филиалының атқарушы хатшысы Гүлжайна Жартыбекова Шымкенттің іргесінде орналасқан Қазығұрт мөлтек ауданының ауыл билерімен кездесті.
Кездесуде жалпыхалықтық референдум туралы, дауыс берудің ережелері мен шарттары жайлы айтылып, қабылданатын әр өзгеріске жеке-жеке түсініктеме берді. Мәжіліс депутаты алдағы өзгерістердің маңыздылығына тоқталды.
— 5 маусымда елде жалпыхалықтық референдум өтеді. Бұл шараның маңызы ерек. Конституцияның үштен бір бөлігі өзгеруі мүмкін. Ол үшін барлығымыз жұдырықтай жұмылуымыз керек. Осы күнге дейін Конституциямыз төрт рет өзгерді. Бірақ бұған дейін Парламент шешім қабылдады. Енді халықтың еркіне беріліп отыр. Мұны билік пен бұқараның арасы тағы бір табан жақындай түсті деуге болады, — деді мәжілісмен.
Кездесу барысында ауыл билері елдімекеннің өзекті мәселелері туралы сөз қозғап, оның шешу жолын да ақылдасты. Партия белсенділері барша тұрғынды референдумға қатысуға шақырды.
