Түркістан облысында Рамазан айы қарсаңында екі мешіт ел игілігіне берілді. Атап айтсақ, Шардара ауданының Жаушықұм ауылдық округінде жаңадан заман талабына сай биік мұнаралы алтын күмбезді мешіт бой көтерді.
Жеке кәсіпкер Алтынбек Қонаров ескі мешіт орнына жаңа құлшылық ордасының салынуына демеуші болып, ауыл тұрғындарын қуантты. Салтанатты рәсімде алдымен Құран аяттары оқылып, дұға жасалса, Шардара ауданы әкімінің орынбасары Нұрмахан Нартайұлы ауыл тұрғындарын көптен күткен мешіттің ашылуымен құттықтады. Сондай-ақ мешіт құрылысына демеушілік жасаған Алтынбек Құрманбекұлына ризашылығын білдіріп, аудан әкімі Қайрат Жолдыбайұлының атынан алғыс хатпен марапаттады.
Одан бөлек еңбек ардагері Рахым Көлбайұлы, аудандық қажылар қауымдастығының мүшесі Ислам Әуесұлы жиналған жұртшылыққа құттықтау сөздерін айтты. Ал Шардара аудандық орталық мешітінің бас имамы Марат Асанов та ауыл тұрғындарының қуанышына ортақтасып, Түркістан облысының бас имамы Еркебұлан Қарақұловтың құттықтау сәлемін жеткізді.
«Мешітке кез келген адам ізгілік іздеп келеді. Мешіт – адамдарды мейірімділікке, сүйіспеншілікке шақыратын, бір-біріне қамқор болып, қол ұшын беретін, мұқтаж адамның жанына тыныштық табатын, сондай бір қасиетті ұлық мекен. Бұл – имандылықтың, білімнің, ғылымның ордасы» деді ол.
Мешітке тыл ардагері, қос дәуірдің куәгері, елге еңбегі сіңген, көпке қамқор болған Қонар Бегімбетовтің есімі берілді.
Сондай-ақ Түркістан облысы Жетісай ауданына қарасты Жылы су ауылдық округінде жаңа мешіт ел игілігіне берілді.Рамазан айы қарсаңында пайдалануға берілген «Ән-Нуур» мешітінің ашылу рәсіміне ҚМДБ төрағасының орынбасары, Шариғат және пәтуа бөлімінің меңгерушісі Сансызбай Құрбанұлы мен Жетісай ауданының бас имамы Жорабай Дулатбаев, сондай-ақ дін саласының мамандары, ардагерлер мен жергілікті тұрғындар қатысты. Өмірден өткен ата-баба рухына құран бағышталып, ас берілді. Жамағатпен бірге жұма намазы оқылды. Көпшілікпен бірге мешіт ауласына көшет егілді.
Мешіт құрылысына демеушілік жасаған ауылға белгілі азамат Пердебек қажы Бахтияров екенін атап өткен жөн. Ұрпақ қамын ойлап, елі үшін тер төккен азаматтың еңбегін бағалап, ағайын-туыс пен ауылдастары Пердебек Бахтияровтың иығына зерлі шапан жауып, астына ат мінгізді.
Бір мезетте 350 адамның еркін құлшылық етуіне мүмкіндік жасалған мешітте намазхана мен дәретхана, діни сауатын арттырушыларға арналған кішігірім кітапхана да бар.
