Қазақстандағы жалпыұлттық бірлік пен қоғамдық келісімді орнатуда Қазақстан халқы Ассамблеясы мен оның облыс, қалалардағы бөлімшелерінің атқаратын жұмыстары ұшан-теңіз. Өйткені сол ассамблея арқылы этностар өкілдерін, түрлі ұлт жастарын қазақ халқының айналасына шоғырландыру бірлік пен қоғамдық келісімге кепіл болады. Таяуда үшінші мегаполиске іссапармен келген ҚХА Төрағасының орынбасары Марат Әзілханов қаланың этномәдени бірлестіктерінің төрағаларымен кездесіп, Президент Жолдауын іске асыруға Ассамблеясының атсалысуы, өңірдегі этносаралық келісімді нығайту шаралары тақырыптарын талқылады.
Шымкент қалалық ҚХА өзекті мәселелерді шешуге әрдайым белсене атсалысады. Қаланың этномәдени бірлестіктері азаматтық қоғам институттары ретінде жақсы дамыған. Жиында сөз алғандар ассамблея жұмысымен таныстырып, бірқатар мәселелердің шешілуін сұрады.
«Қоғамдық келісім мекемелерінде жұмыс істейтін қызметкерлердің жалақылары өте төмен. Бүгінде жалақының тым төмен болуы салдарынан аталған мекемеде білікті мамандар тұрақтамайды. Себебі, 60-80 мың теңгеге кім келеді? Осы тұрғыда министрлікке осы саладағы азаматтық қызметкерлердің жалақысын есептеп, көбейту туралы ұсыныспен шығуды біз сұранамыз», дейді сала жауаптылары.
Іс-шарада ассамблеяның «Жаңғыру жолы» жастар қозғалысының тиімді қызметін қамтамасыз ету қажеттілігі айтылды. Сондай-ақ төраға орынбасары: «Биылғы Жолдау – ел бірлігін сақтаудың маңызын және Тәуелсіздікті нығайту қажеттілігін ұғындыратын айрықша құжат. Баршамызды біріктіретін құндылықтардың арқасында біз 30 жыл татулық пен келісімде өмір сүріп келеміз, тәуелсіз Қазақстанды құрдық, Тәуелсіздіктің ұрпағын өсірдік» деп мегаполистік ассамблея өкілдерін мемлекет басшысының Жолдауын жүзеге асыруда белсенді атсалысуға шақырды.
Бүгінде үшінші мегаполисте жүзден астам этнос өкілдері өмір сүреді. Сондай-ақ, 16 этномәдени орталықтары мен 5 «Қоғамдық келісім» мекемелері жұмыс істейді.
