Еліміздің Президенті Қасым-Жомарт Тоқаев елдегі эпидемиологиялық ахуалға байланысты жиында «Карантин талаптарын қатаң сақтау және жаппай вакцина ектіру арқылы ғана коронавирус індетін ауыздықтау мүмкін екенін айтқан еді. Сол жиында карантиндік режимді қатаңдатумен қатар сол режимнің талаптарының орындалуын да қатаң қадағалаудың қажеттігін ескерткен.
Себебі, карантинді қанша қатайтқанымен оны түсінбейтін, өзіне де айналасындағыларға да қауіп төндіріп, індет жұқтыруы мүмкін екенін ескермейтіндер арамызда әлі табылуда. Шымкент қаласының әкімінің тапсырмасымен қаладағы мобильдік топтардың санын арттырып, жұмысын жандандыру өз нәтижесін бере бастады.
Мысалы, қаладағы Әл-Фараби ауданының тәртіп сақшылары Байтұрсынов көшесінде орналасқан «Наурыз» бильярд клубының карантин талаптарын бұзып, «Ашық» бағдарламасына тіркелмей, 23:00-ге дейін жұмыс жасап тұрғаны белгілі болды. Сонымен қатар, кәсіпкерлік нысан жұмысшылары медициналық бетпердесіз қызмет көрсеткен.
Аталған жайт бойынша, жинақталған іс-құжаттар ҚР ӘҚБтК-нің 425-бабымен (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) шара қолдану үшін Шымкент қаласының санитарлық-эпидемиологиялық бақылау департаментіне жолданды.
Осы орайда, Шымкент қаласы Полиция департаментінің қызметкерлері қала тұрғындары мен қонақтарын карантин режимін қатаң сақтауға шақырады.Өйткені, оны бұзу арқылы ең алдымен өз өміріңізге, туыс-жақындарыңыздың өміріне, айналадағылардың өміріне қауіп төндіретініңізді ұмытпағаныңыз жөн.
