Мемлекет басшысы халыққа арнаған Жолдауында ұлтымыздың жаңа жағдайға бейімделіп, ұлттық тамырымыз арқылы серпілуді, жастарымыз барлық жағынан да бәсекеге қабілетті болуы үшін жан-жақты рухани байлығын көтеруді ұсынған еді. Ұлттық тамырдан нәр алған жас ұрпақ қана емес бүкіл халқымыз еңсесін тіктеп бәсекеге қабілетті ұлтқа айналуы өте маңызды.
Оқи отырыңыз...
Қазақы қаймағы бұзылмаған Оңтүстіктегі үшінші мегаполисте ұлттық рухты егу, халық дәстүрін жаңғырту арқылы жас ұрпақты тәрбиелеу жүйелі жүргізіледі. Соның бірі Шымкенттегі Әдет-ғұрып және салт-дәстүр орталығы алаңына оюлы текемет салынды. Жәй емес, қошқар мүйізді текемет. Ынтымағы жарасқан ұжымның еңбегі деуге болады.
Қазақ дәстүрімізді дәріптеп, ұлттығымызды ұлықтап жүрген орталықтың тың идеясы.
Оюлы текемет түрлі-түсті бояумен безендірген. Алдағы уақытта орталыққа келген қала тұрғындары мен қонақтары текеметті тамашаласа, ал балақайларға түрлі ұлттық ойындарды, яғни орталық іс-шараларын осы текемет үстіне ұйымдастырылатын болады.
Қошқар мүйіз өрнегінің мағынасы туған жер төсін толтырған отар-отар қой деген халықтың арман-тілегін, молшылықты білдіреді.
Қазақстан аумағы бойынша жалғыз орталық, яғни «Әдет-ғұрып және салт-дәстүр» орталығы Шымкент шаһарында орналасқан. Мұнда салт-дәстүр, әдет-ғұрыптарымызға байланысты жан-жақты ғылыми-зерттеу және әдістемелік жұмыстар жүргізіліп, баспа өнімдері шығарылып және де ғасырдан ғасырға жеткен ұлттық құндылықтарымыз жастарға кеңінен насихатталады. Сондай-ақ, Оңтүстікті мекендеген өзге ұлыс өкілдерінің де әдет-ғұрып, салт-дәстүрлері жүйелі түрде зерделеніп, ортақ игілікке пайдалану жағы қарастырылған.
Мұндағы негізгі ұстаным – Елбасымыздың «Мәңгілік Ел» идеясын, «Ұлы даланың жеті қыры», «Рухани жаңғыру» бағдарламалық мақалаларын жүзеге асыру болып табылады.
«Newqazaq.kz» ақпараттық порталы.
