Мемлекет басшысы Қ.К.Тоқаевтың таяуда Үкіметтің онлайн отырысында пандемиялық ахуалдың өршіп кетуіне қарсы іс-шаралар белгілеп, індетпен күресте ең бірінші кезекте короновируске қарсы вакцина ектіруді халыққа түсіндіру мен екпе алу санын көбейту туралы тапсырмаларын Шымкент қаласында қарқынды орындау жалғасуда.
Еліміздің үшінші мегаполисі бұған дейін де вакцина салдырудан еліміз бойынша алдыңғылар қатарында келе жатқан. Бүгінде қала әкімі Мұрат Әйтеновтің тікелей басшылығымен бұл саланың жұмысын бұрынғыдан да жандандыра түсті.
Шымкент қаласында өткен тәулік ішінде коронавирус инфекциясына қарсы 6379 адам вакцина салдырды: I компонент-1778, II компонент-4601. Егу науқаны басталғалы барлығы 358 446 адам вакциналанды. Оның ішінде 251 852 адам вакцинаның екі компонентін алды.
27 шілде күні қалада КВИ-дің 421 жағдайы тіркелді (белгілері бар – 359, белгілері жоқ – 62). 285 адам инфекциялық стационарға жатқызылып, 136 адам үй бақылауына алынды.
Қазіргі таңда мамандандырылған инфекциялық стационарларда барлығы 3 106 орын бар. Төсек-орын толымдығы 65 %-ды құрайды.
Сондай-ақ, өткен тәулікте ішінде 815 нысанға тексеру жұмыстары жүргізілді. Оның ішінде 12 нысанда карантин режимінің талаптары бұзылғандығы анықталып, әкімшілік хаттамалар толтырылды.
