Бүгінде электрониканың дамығаны соншалықты қағаз түріндегі дүниелерді қолдану сиреп келеді. Кітапханалардағы кітаптардың өзінің электронды нұсқалары жасалып, заман талабына сай етілуде. Дегенмен Президентіміз айтқандай жаңа жағдайға сай жас ұрпақ тәрбиелеу үшін жұрттың кітапханаларға қызығушылығын көтеру керек. Оқырман ол жерде заманауи жағдайларда білімін кеңейтуге мүмкіндік ала алса ғана онда көптеп баратын болады. Шымкент қаласының басшылығы биыл бірнеше кітапханаға күрделі жөндеулер жасап, олардың жабдықтарын заманауи құрал-жабдықпен жаңартты. Жұртшылықты кітапханаға тартудың әртүрлі жолдары қарастырылуда.
Әл-Фараби атындағы Шымкент қалалық ғылыми-әмбебап кітапханасында ғұлама ғалым Әбу Насыр әл-Фарабидің астрономия ғылымына арналған «Планетарий залы» іске қосылды. Аталған планетарий бұл жұлдызды аспан, күн, ай және планеталардың кескінін жарты сфералық күмбез түріндегі экранға түсіріп көрсетуге арналған аппарат.
Әл-Фарабидің тұжырымдамасында, бұл көктегі қозғалыстарды зерттеуді арифметика мен геометрия арқылы зерттеуге болады. Кітапханада іске қосылған планетарий залында келушілер орындықтарға жайғасып, жоғарыдағы экраннан ғаламшар әлемін тамашалай алады. Бейне көріністер орыс және ағылшын тілдерінде көрсетіледі. Алдағы уақытта оны қазақ тіліне тәржімалау жоспарлануда.
«Newqazaq.kz» ақпараттық порталы.
