Дүниежүзін жайлаған індет түрлі құбылып, құтырынып тұр. Қазақстанда да біртіндеп бір аймақтан басқалары «қызыл аймаққа» кірді. Мемлекет басшысы арнайы жиын өткізіп осы жағдайды сарапқа салып, шұғыл шаралар жасап, халықтың індеттен сақтандыруды, карантин талаптарын қатаң сақтауды қадағалауды жергілікті әкімдіктер мен құқық қорғау органдарына тапсырды.
Шымкентік полицейлер тұрғындарға медициналық бетперде таратуды жалғастырып жатыр. Еңбекші ауданының Полиция басқармасының ұйымдастыруымен «COVID-19» инфекциясының алдын алу мақсатында игі іс-шара өтті. Миллионды қаланың көшелері мен көпшілік орындарда полициейлер медициналық бетперделерді тегін үлестірді.
Арнайы белгісі бар бетпердені тарату барысында полицейлер Шымкент қаласы Бас мемлекеттік санитарлық дәрігерінің соңғы Қаулысына сәйкес, қала аумағындағы карантин талаптарының сақталуына байланысты түсіндірме жұмыстарын жүргізді. Тіпті қоғамдық орындарда бетперде тақпаудың өзі құқық бұзушылық екенін, ол үшін ескерту беріліп қана қоймай, қайталанса заңмен жазаланатындарын да түсіндіріп, тегін бетперделер таратты.
Айта кетейік, акция барысына қала тұрғындарына 200 дана тегін медициналық маска таратылды. Ондағы мақсат – азаматтардың бетпердені ұдайы тағып жүру қажеттігін түсіндіріп, арнайы дағдыны қалыптастыру.
Қауіпті індетпен күресу барысында медицина қызметкерлерімен бірге полицейлер алдыңғы шепте жұмыс атқарып келеді. Індеттің бетін қайтарып, өмірімізге қауіпті сейілту үшін Мемлекет басшысы айтқандай әрқайсымыз жауапкершілігімізді арттырып, құқық бұзбай, карантин талаптарын қатаң сақтауымыз керек екенін ұмытпайық.
«Newqazaq.kz» ақпараттық порталы.
