Президент Қасым-Жомарт Тоқаев өзінің биылғы жылға арнаған қазақстандықтарға Жолдауында халықтың жайлы өмір сүруіне жағдай жасау қажеттігін баса айтқан еді. Көпқабатты үйлердің тұрғындары үшін үйді тоздырмай ұстау, газ, су, электр, канализация, жертөле мәселелерін бірлесіп шешу үшін бірлік керек.
Шымкент қаласының әкімдігі көпқабатты үйлер тұрғындарының жайлы жағдайда болуы үшін мүлік иелерінің бірлестігін құрудің тиімділігін жұртшылыққа түсіндіруде. Соның арқасында Шымкент қаласының аудан аумақтарында мүлік иелерінің бірлестігін құру жұмыстары қарқынды жүргізілуде.
Әл-Фараби ауданы әкімінің орынбасары Алдияр Мұсабаев Спорт шағынауданының тұрғындарымен кездесіп, «БІР ҮЙ–БІР БІРЛЕСТІК–БІР ШОТ» қағидаты туралы кеңінен түсіндірді.
Сондай-ақ, кездесу барысында көпқабатты үйлердің жылыту маусымына дайындық жұмыстары, ауланың санитарлық тазалық мәселелері жайы да сөз етілді. Аула тұрғындары мүлік иелерінің бірлестігін (МИБ) және жай серіктестікті (ЖС) құру бойынша сұрақтарын қойып, тұшымды жауап алды. Нәтижесінде, 1 көпқабатты үй мүлік иелерінің бірлестігіне тіркелді. Ал 2 аула тұрғындары қол жинау жұмыстарын жүргізуде.
Бүгінде Әл-Фараби ауданы аумағында жалпы 672 көпқабатты тұрғын үй орналасқан. Оның ішінде 51 көпқабатты тұрғын үйде мүлік иелерінің бірлестігі құрылып, қалалық Әділет департаментіне тіркелді.
Осылайша мегаполисте Мемлекет басшысының Жолдауы нақты іс жүзіне асырылуда.
