Мемлекет басшысы Қасым-Жомарт Тоқаевтың еліміздің ірі қалаларындағы жұмысшы жастарды пәтермен қамтамасыз ету тапсырмасы бойынша бүгінге дейін шаһарда мыңнан аса пәтер берілді. Тұрғын үй кезегінде тіркелген, жалпы кезектегілер саны – 9023. Баспанаға мұқтаж жастар әртүрлі салалардың өкілдері, арнаулы категорияға жататын мүмкіндігі шектеулі, жетімдер үйінде тәрбиеленген, тағы басқа да жастар бар.
Мемлекет басшысы айтқандай еліміздің болашағы жастарда болғандықтан да оларға балабақша мен мектептен бастап барлық жақсы жағдайлар жасалуы қажет. «баланы бастан…» дегендей сол кезден берілген тәлімді тәрбие мен терең білім мемлекетіміздің болашағына тірек болатын азаматтарды қалыптастырады. Сонымен бірге, жастар диплом, мамандық алған соң жұмыспен қамтылып, отау құрған соң баспанамен қамтылса нұр үстіне нұр болар еді. Сонда жастарымыз мемлекеттің экономикасын көтеруге алаңсыз жұмыс жасар еді.
Мемлекет басшысының осындай болашақты ойластырған мақсатының негізінде берілген тапсырмасын Шымкент қаласының әкімі Мұрат Әйтенов терең түсіне отырып, сол міндеттердің үдесінен шығу үшін қаладағы баспана мәселесіне, оның ішінде студент жастардың жатақханасынан бастап жас отбасылардың баспаналы болу мәселесіне көңіл бөліп келеді.
Қалалық Жастар ресурсы орталығы мен тиісті басқармалар осы бағытта жұмыс жүргізіп, мемлекеттік баспанаға байланысты бағдарламалар бойынша жастарды пәтермен қамтамасыз етуде. Баспанамен қамту жұмысы жалғасуда. Жастар орталығы жас отбасылары арасында екінші деңгейлі банктер мен «Отбасы» банкін насихаттап, баспанаға мұқтаж жас отбасыларына түсіндіру жұмыстарын да жүргізіп отыр. Өйткені, мемлекеттік бағдарламалар осы банктер арқылы жүзеге асырылатындықтан бұл жұмыстар жалғаса беретін болады.
