Шымкентте кітапханаларды модернизациялау жұмыстары жүргізіліп жатыр. Оқу залын заманауи үлгіде жабдықтап, жылпыға ыңғайлы орта қалыптастыру мақсатында тағы 3 кітапхана пайдалануға берілді. Президенттің рухани құндылыққа басымдық беру пәрменіне орай ашылған білім ордасы өз оқырмандарын қуантып отыр.
Кристина Бекмурзаева, жоба авторы:
– Ештеңе бір орнында тұрып қалмайды. Кітапханалар да белсенді дамып, өзгеруде. Жұмыс тәсілдері де жақсы жаққа қарай бет алуда. Шымкент қаласы да көптеген жаңа, креативті идеяларға үн қатып, осы бағыттағы жұмыстарымызды қолдап отырғаны бізді қуантады.
Қолайлы ортаның құрылғанына ең әуелі жастар жағы қуанды. Себебі, мұнда шахмат үстелінде зейінін ашып, зерек ұл болып қалыптаса алады. Ата жолын жаңғыртып, ұлттық ойын тоғыз құмалақты меңгереді. Асық атып, доп теуіп, бос уақытын тиімді үйлестіре алады.
Биыл 10 кітапханаға осындай модернизация жұмыстарын жүргізу жоспарланды. Алғашқы жартыжылдықта 6 кітапхана өз жұмысын бастады. Алдағы күз айларында тағы 4 кітапхана ел игілігіне берілмек.
Шыңғыс Мұқан, қала әкімінің бірінші орынбасары:
– Бұл кітапханалар жаңа форматта жұмыс жасайды. Тек кітапхана болып қалмайды. Бұл қоғамдық орын, қоғамдық орталыққа айналып отыр. Екі форматта кітапханалар желісін жаңғыртып жатырмыз. Бірі – Абай қоғамдық орталықтары. Екіншісі – балаларға арналған кітапханаларымызды отбасылық кітапханасы форматында жасап жатырмыз»,- дейді.
Жастармен бірге жасы үлкен қартқа да, бала бағып үйде отырған анаға да ыңғайлы етіп жабдықталған кітапханалар көпшілікке есігін айқара ашуда. Енді кітап оқуға ынтық жан, баласын ойын үйірмелеріне беріп, алаңсыз әдебиет әлеміне ене алады. Бұл жастарымызға жасалып жатқан қамқорлықтың жемісі.
