Мемлекет басшысы құқықтық реформалар арқылы заңды құрметтейтін қоғам құрғанда ғана құқық бұзушылық, қылмысқа бой ұрудың азаятынын, азаматтардың жауапкершілігі артатынын талай айтып келеді. Сондықтан да, жергілікті әкімдіктер тұрғындардың құқық бұзуына жол бермей, алдын алу шараларын жүргізуде.
Оқи отырыңыз...
Бір қарағанда, көшедегі бағдаршамның құқық бұзу мен қылмыстың орын алуына қатысы шамалы сияқты. Ал, шындығында сол бағдаршамнан өту ережесін автокөлік иесі де, жаяу жүргінші де сақтар болса қаншама құқық бұзушылық орын алмас еді. Бағдаршамнан дұрыс өтуді балабақша мен мектеп қабырғасынан бастап үйретеді. Сондықтан бала күннен құқық бұзушылыққа бармай, жауапкершілікті сезіне білу маңызды.
Қалада тұрғындардың жол қауіпсіздігін қамтамасыз етуде бірқатар шаруалар қолға алынған. Жаңадан бағдаршамдар, жасанды жол кедергілерін орнату мен жаяу жолаушылар өткелін салу жұмыстары кестеге сай жүргізілуде. Биыл осы мақсатта қалада жалпы 12 бағдаршам орнату мен 12 белсенді жаяу жолаушылар өткелін салу жоспарланған.
Бүгінде аталған бағдаршамның төртеуі орнатылды. Қалған 8 бағдаршам жыл соңына дейін орнатылатын болады. Бұдан бөлек, 12 белсенді жаяу жолаушылар өткелінің үшеуі орнатылды, ал жыл соңына дейін 9 белсенді жаяу жолаушылар өткелі салынады.
Айта кетейік, 2020 жылы Шымкент қаласының жол жүрісі қауіпсіздігін қамтамасыз ету мақсатында жалпы саны 15 бағдаршам орнатылған болатын. Осы аталған жұмыстар негізінде қала аумағындағы жол апаты мен құқық бұзу саны азайды. Бағдаршам мен белсенді жаяу жүргіншілер өткелі жол ережесіне қатысты құқыбұзушылық пен абайсызда орын алатын жол апатын азайтуға септік етеді.
