Шымкент қаласының әкімінің басшылығымен мегаполисте Мемлекет басшысының Жолдауын іспен насихаттау қарқынды жүруде. Президенттің «Халық үніне құлақ салатын үкімет» жайлы айтқанын жүзеге асыру барысында шымкенттіктермен кері байланыс орнаған.
Шымкент қаласы Әл-Фараби ауданының әкімі Рашид Мыңбаев «халықпен кері байланыс» қағидасы аясында кезекті жеке қабылдауын өткізді. Республика даңғылының тұрғындары карантиндік талаптарды сақтамай, түнгі уақытта жұмысын жалғастырып жүрген Республика даңғылында орналасқан қоғамдық тамақтану орнын тексеруді сұраған болатын. Рашид Мамытұлы жауапты сала мамандарына тәртіп сақшыларымен бірге шұғыл түрде рейд ұйымдастыруды тапсырды.
Ал, Жангелдин көшесі №166 үй тұрғындары балалар алаңшасының қажеттігі жөнінде өтініштерін жеткізген болатын. Аудан басшысы аталған аулада биыл «Халық қатысатын бюджет» жобасы аясында абаттандыру және алаңша орнату жұмыстарының атқарылатындығын жеткізді.
Айта кетейік, Әл-Фараби ауданының әкімі @mynbaev_rashid жеке қабылдауын тұрақты түрде әр бейсенбі күні өткізеді. Қабылдауға жазылу үшін тұрғындар әкімдікке келіп, алдын ала өтініш қалдыруы тиіс. Одан бөлек тұрғындар сұрақтарын әр дүйсенбі күні @alfarabi.shymkent парақшасында тікелей эфирде қоя алады.
Аудан тұрғындарымен кері байланыс орнатып, ашық пікір алмасу арқылы аудан әкімі Президенттің халықтың үніне құлақ салу керектігі жөніндегі тапсырмасын орындай отырып, аудан халқымен қоян-қолтық жұмыс жасауда. Жаңа жағдайдағы Қазақстанда жұмысты жаңаша ұйымдастырудың әлеуметтік-экономикалық дамуымызға серпін берері сөзсіз.
