Мемлекет басшысы Қасым-Жомарт Тоқаев өзінің Жолдауында Қазақстанның қарқынды дамуы қоғамдық келісім мен ұлтаралық қатынастардың жақсы болуында екенін атап айтқан.
Оқи отырыңыз...
Ал қазақстандықтардың өзара түсіністікте болып, бір мақсатқа шоғырлануын, мемлекеттік саясатты алға апаруға атсалысуын жергілікті билік орындары қамтамасыз ету керек.
Үшінші мегаполис – Шымкент қаласында жүзден астам этнос өкілдері өмір сүреді. Олардың көпшілігі мемлекеттік тілді меңгергендіктен өзара қатынаста қазақ тілі қарым-қатынас тілі ретінде жиі қолданылады. Мегаполистегі этностардың ірілерінің 17 этномәдени орталығы Қазақстан халқы Ассамблеясының Шымкент қалалық бөліміне тіркеліп басқа этно-мәдени орталықтармен, үкіметтік емес және қоғамдық ұйымдармен қоян-қолтық жұмыс жүргізіп келеді.
Оған қоса қалалық әкімдіктің ішкі саясат және жастар істері жөніндегі басқармасы да жоспарлы түрде этномәдени орталықтармен түрлі бағытта қоғамдық келісім мен ынтымақ-бірлікті, түсіністікті нығайту жолында жұмыс атқарып, іс-шаралар өткізіп келеді. Шымкент қаласы әкімінің бірінші орынбасары Шыңғыс Мұқанның айтуынша мегаполисте биылғы жыл басынан бері этностар шоғырланған жерлерде мақсатты топтармен 45 кездесу және 18 іс-шара, сондай-ақ, лекциялар мен ашық дәрістер ұйымдастырылған.
Қала әкімінің бірінші орынбасары Шыңғыс Мұқан ішкі саясат және жастар істері жөніндегі басқармасының 6 айлық жұмысы туралы есебінде қаладағы қоғамдық келісім мен ұлтаралық қатынастарды нығайту туралы кеңінен айтып берді.
Оның айтуынша, есепті мерзімде қаланың қоғамдық-саяси ахуалы мен этносаралық қатынастар саласына теріс ықпал еткен оқиғалар тіркелмеген. Яғни, миллиондық тұрғыны бар қалада жан-жақты жүргізіліп келе жатқан жұмыстардың арқасында қоғамдық-саяси ахуал қалыпты.
