Ұлттық рухтың алтын арқауы – қасиетті домбыраны ұлықтауға арналған Ұлттық домбыра күні қарсаңында Шымкент қаласы ішкі саясат басқармасының «Қоғамдық келісім» КММ жанындағы Аналар кеңесінің «Айналайын» жобасы аясында қалалық перзентханада дүниеге келген нәрестелер мен олардың аналарына естелік сыйлықтар табысталды.
Тағылымды іс-шараның басты мақсаты – қазақ халқының ғасырлар бойы қалыптасқан рухани және мәдени мұрасын дәріптеу, ұлттық құндылықтарды жас ұрпақтың санасына сіңіру, отбасы институтының маңызын арттыру, аналарға деген құрмет пен ізетті көрсету, сондай-ақ өмірге жаңа келген сәбилердің ата-аналарына ақжарма тілек пен жылы лебіз білдіру болды.
Ұлттық домбыра күні – халқымыздың дәстүрлі өнері мен рухани мұрасын ұлықтайтын маңызды мерекелердің бірі. Домбыра – қазақ халқының тарихын, қуанышы мен мұңын, елдік рухы мен дүниетанымын ұрпақтан-ұрпаққа жеткізген қасиетті аспап. Сондықтан бұл күнді отбасы құндылықтарымен байланыстыра атап өту ұлттық тәрбиенің сабақтастығын нығайту тұрғысынан ерекше мәнге ие.
Шара барысында Аналар кеңесінің мүшелері жас аналарды Ұлттық домбыра күнімен құттықтап, ана мен балаға мықты денсаулық, шаңырақтарына береке мен бірлік тіледі. Өмірге жаңа келген сәбилерге ақ баталарын арнап, олардың елін сүйетін, халқына қызмет ететін азамат болып ер жетуіне тілектестік білдірді.
Жас аналарға табысталған естелік сыйлықтардан ұлттық нақыш пен қазақы тәлімнің мәні көрініс тапты. Сыйлықтар арқылы аналық мейірім, отбасылық жылулық, үлкенді құрметтеу, кішіге ізет көрсету және ұлттық дәстүрді сақтау секілді құндылықтарды насихаттауға басымдық берілді. Мұндай ізгі ниетке негізделген шара жас отбасыларға ерекше көңіл бөліп, олардың қоғамдағы орны мен отбасылық құндылықтардың маңызын айқындай түседі.
Аналар кеңесінің мүшелері жас отбасыларға бала тәрбиесінде ұлттық салт-дәстүр мен рухани құндылықтарды басшылыққа алудың маңыздылығын атап өтті. Себебі отбасындағы тәрбие – баланың тұлға ретінде қалыптасуына әсер ететін негізгі орта. Балаға берілген мейірім, өнеге мен дұрыс тәрбие оның болашақтағы азаматтық ұстанымының қалыптасуына негіз болады.
Іс-шара барысында ұрпақ сабақтастығы мәселесіне де назар аударылды. Аға буынның өмірлік тәжірибесі мен өнегесін жас отбасыларға жеткізу, аналар арасындағы өзара қолдауды күшейту және отбасылық құндылықтарды дәріптеу – қоғамдағы тұрақтылық пен келісімді нығайтатын маңызды бағыттардың бірі.
«Айналайын» жобасы аясындағы мұндай бастамалар жас аналарға моральдық қолдау көрсетіп қана қоймай, ұлттық мәдениет пен салт-дәстүрдің күнделікті өмірдегі маңызын насихаттауға мүмкіндік береді. Ізгілікке, мейірімге және өзара құрметке негізделген мұндай кездесулер қоғамдағы жылылық пен бірлікті арттыруға ықпал етеді.
Осындай тағылымды бастамалар арқылы ұрпақ сабақтастығы, анаға деген құрмет, отбасы берекесі мен ұлттық руханияттың өміршең құндылықтары кеңінен насихатталып, жас отбасыларға ізгілік пен бірліктің өнегесі көрсетілуде. Ұлттық мұраны ұлықтау мен отбасылық құндылықтарды дәріптеу – ел болашағы саналатын жас ұрпақты тәрбиелеудің маңызды негізі.
