Бүгін Түркістанда Өңірлік кәсіпкерлер палатасының ұйымдастыруымен Жас кәсіпкерлер клубының «галстуксіз форматтағы» кезекті отырысы өтті. Кездесу жас кәсіпкерлер мен даму институттары арасындағы ашық диалог алаңына айналды.
Іс-шараны Түркістан облысы кәсіпкерлер палатасы директорының орынбасары Ербол Ауелбеков жүргізді. Кездесудің басты мақсаты – жас кәсіпкерлердің өзекті мәселелерін еркін форматта талқылау, мемлекеттік және қаржылық қолдау тетіктерін түсіндіру, сондай-ақ жаңа идеялар мен жобаларға жол ашу.
Отырыстың ашылуында Түркістан облысы кәсіпкерлер палатасының директоры Асылан Ибадуллаев алғы сөз сөйлеп, Палатаның жас кәсіпкерлерді қолдаудағы ұстанымына тоқталды.
«Бүгінгі кездесудің галстуксіз форматта өтуі – біз үшін өте маңызды. Себебі ашық диалог, еркін пікір алмасу және нақты ұсыныстар ғана бизнесті алға жылжытады. Кәсіпкерлер палатасының басты мақсаты – кәсіпкерлерге кедергі емес, сенімді серіктес болу», – деді Палата директоры.
Кездесу барысында «Open Turkistan» туристік ақпараттық орталығының басшысы Асқар Абубакиров «Креативті жобаларды құрудағы жастардың пайдаланылмаған мүмкіндіктері» тақырыбында баяндама жасап, туризм мен шығармашылық индустриядағы жаңа бағыттарға тоқталды. Сонымен қатар, «TURKISTAN» кәсіпкерлерге қызмет көрсету орталығының басшысы Берік Кенжебаев, Astana Hub Түркістан қалалық филиалының басшысы Алихан Сламбек, сондай-ақ екінші деңгейлі банктердің өңірлік өкілдері қаржыландыру және бизнеске сервистік қолдау тетіктері туралы ақпарат берді.
Іс-шараның екінші бөлігінде жас кәсіпкерлер өз жобаларын таныстырып, тәжірибе алмасты. Сұрақ-жауап форматында бизнесті жүргізу барысында кездесетін нақты мәселелер көтеріліп, оларды шешу жолдары талқыланды.
Өз сөзінде Асылан Ибадуллаев Палата жүзеге асырып жатқан «Бір ауыл – бір өнім» бастамасы мен шағын және микробизнесті қолдауға арналған «Іскер аймақ» бағдарламасына ерекше тоқталды. Аталған бағдарламалар ауыл жастары мен жаңа бастаған кәсіпкерлерге қолжетімді қаржыландыру мен кешенді қолдау ұсынуға бағытталғанын атап өтті.
«Палата қандай да бір мәселені жеке кәсіпкердің емес, бүкіл бизнес-қоғамдастықтың мәселесі ретінде қарайды. Біз жас кәсіпкерлер үшін әрдайым ашықпыз және идеяларыңызды қолдауға дайынбыз», – деді ол.
Жиын соңында қатысушылар мұндай еркін форматтағы кездесулердің маңыздылығын атап өтіп, оларды тұрақты түрде өткізу қажеттігін жеткізді. Кездесу жас кәсіпкерлер үшін жаңа серіктестікке, нақты ұсыныстар мен бастамаларға жол ашқан тиімді алаң болды.
