Бүгін Қызылорда қаласында Мемлекет басшысы Қасым-Жомарт Тоқаевтың қатысуымен Ұлттық құрылтайдың бесінші отырысы басталды. Маңызды жиынға мемлекет және қоғам қайраткерлері, саяси партиялар мен үкіметтік емес ұйым өкілдері, бизнес пен сараптамалық қауымдастық мүшелері, сондай-ақ өңірлік қоғамдық кеңестердің өкілдері қатысуда.
Ұлттық құрылтай соңғы жылдары ел дамуына айрықша серпін берген тиімді алаңға айналды. Төрт жыл ішінде Құрылтай мүшелері көтерген бастамалардың негізінде 26 заң қабылданып, мемлекет өмірінің түрлі саласына оң өзгерістер енгізілді. Әйелдер мен балалардың құқықтарын қорғау күшейтілді, ойынқұмарлық пен нашақорлыққа қарсы жүйелі күрес басталды, ономастика саласы ретке келтірілді. Мемлекеттік наградалар жүйесіне жаңа құрметті атақтар енгізіліп, еңбек адамдарының мәртебесі арта түсті. Мұның бәрі Құрылтайдың ауқымды реформалардың қозғаушы күші екенін айқын дәлелдейді.
Президент атап өткендей, қоғамның санасы жаңғырмайынша, реформалардың нәтижелі болуы мүмкін емес. Сондықтан мемлекеттік саясатта мәдениет пен өнерге ерекше мән берілуде. Алдағы уақытта елімізде бұрын-соңды болмаған көлемде мәдени нысандар салынып, жаңғыртылады. Алматы облысында қазақ драма театры, Абай мен Ақтөбе облыстарында жаңа театрлар бой көтереді. Шымкент қаласында опера және балет театрының құрылысы басталмақ. Сонымен қатар екі жыл ішінде елімізде 100-ден астам мәдениет ошағы жөнделеді.
Қызылорда қаласында ашылған жаңа тарихи-өлкетану музейі – осы бағыттағы жарқын мысал. Заман талабына сай жабдықталған бұл орталық музей ісін ұйымдастырудың тың үлгісін көрсетіп отыр. Сонымен бірге Қызылордада жаңа драма театры мен заманауи кітапхананың құрылысы басталмақ.
Мемлекет басшысы өз сөзінде Абай ілімінің ұлттық бірегейлігіміздің өзегі екенін ерекше атап өтті. «Адал азамат» тұжырымдамасы ұлы ойшылдың «Толық адам» идеяларымен үндес. Абайдың «Қара сөздерін» ЮНЕСКО-ның «Әлем жады» тізіміне енгізу – рухани мұрамызды әлемге танытудың маңызды қадамы.
Сондай-ақ Президент Парламентті жаңғырту мәселесіне кеңінен тоқталды. Болашақ заң шығарушы орган тиімді әрі кәсіби болуы тиіс. Осы орайда депутаттар саны емес, олардың сапасы шешуші мәнге ие екені атап өтілді. Жаңа Парламенттің мандат саны 145 болып белгіленіп, заң қабылдау үдерісі үш кезеңнен тұратын жаңа форматқа көшпек. Бұл заңдардың сапасын арттырып, депутаттардың жауапкершілігін күшейтуге мүмкіндік береді.
Конституциялық реформа аясында Ата заңның мәтінін тілдік және мазмұндық тұрғыда жетілдіру, преамбуланы ұлттық құндылықтарға сай қайта жазу мәселесі де көтерілді. «Әділетті Қазақстан» қағидатын Конституцияға енгізу – ел дамуының басты бағдарын айқындайтын маңызды шешім болмақ.
Әділетті Қазақстан құру жолында сот жүйесінің рөлі айрықша. Президент атап өткендей, әділ әрі тәуелсіз сот – азаматтардың мемлекетке деген сенімінің басты негізі. Сондықтан сот жүйесін жетілдіру, судьялардың кәсібилігі мен жауапкершілігін арттыру, сот шешімдерінің әділдігі мен ашықтығын қамтамасыз ету – алдағы кезеңнің басым міндеттерінің бірі болып қала береді. Заң үстемдігі орнықпайынша, қоғамда әділет салтанат құрмайды.
Ұлттық құрылтай – халықтың үнін билікке жеткізетін, ел болашағын айқындайтын маңызды институт. Қызылордада өткен бұл жиын қоғам мен мемлекеттің ортақ жауапкершілігін күшейтіп, жаңа реформаларға нақты бағыт берді.
Айгүл МАМЫТ,
журналист.
