Тіл – әрбір ұлттың рухани өзегі, тарихи жадын сақтаушы, мәдениеті мен болмысының айнасы. Ана тілі бар жерде ұлт бар, ал тілі жоғалған халықтың болашағы бұлдыр. Сондықтан мемлекеттік тілді құрметтеу мен дамыту – әрбір азаматтың, соның ішінде құқық саласы қызметкерлерінің де қасиетті міндеті.
Қазақстан Республикасының Конституциясында қазақ тілі – мемлекеттік тіл ретінде бекітілген. Бұл – тәуелсіздігіміздің басты нышандарының бірі. Мемлекеттік тіл – елді біріктіретін, қоғамды ұйыстыратын, ұлттық сананы қалыптастыратын басты құрал. Құқықтық мемлекет құру жолында мемлекеттік тілдің сот ісін жүргізуде кеңінен қолданылуы ерекше маңызға ие.
Сот жүйесі – мемлекет пен халық арасындағы сенім көпірі. Ал сол сенімнің берік болуы, ең алдымен, азаматтардың өз ана тілінде ойын еркін жеткізіп, құқығын қорғай алуымен тығыз байланысты. Сот процестерінде мемлекеттік тілдің қолданылуы азаматтардың сотқа деген сенімін арттырып, әділдіктің салтанат құруына жол ашады.
Бүгінде сот органдарында мемлекеттік тілді дамытуға бағытталған нақты жұмыстар жүргізілуде. Құжат айналымы, сот отырыстары, түсіндіру жұмыстары қазақ тілінде жүргізіліп, азаматтарға тілдік кедергісіз құқықтық көмек көрсетуге жағдай жасалуда. Бұл – заң талаптарын орындаумен қатар, ұлттық құндылықтарды дәріптеудің айқын көрінісі.
Тілге деген құрмет – заңға деген құрметпен тең. Өйткені заң халыққа түсінікті тілде сөйлегенде ғана өз мақсатына жетеді. Мемлекеттік тілде сауатты сөйлеп, кәсіби деңгейде қызмет атқару – әрбір сот қызметкерінің абыройлы борышы.
Тіл – тек қарым-қатынас құралы емес, ол – тәрбие, тағылым, бірлік бастауы. Ана тілі арқылы ұрпаққа ұлттық рух, елге деген сүйіспеншілік, әділдік пен жауапкершілік сезімі сіңеді. Осы құндылықтарды сақтау – баршамызға ортақ міндет.
Тіл – ұлттың жаны, ал мемлекеттік тіл – тәуелсіздігіміздің тірегі. Оны құрметтеу, дамыту және күнделікті қызметте кеңінен қолдану арқылы біз құқықтық мемлекетіміздің негізін нығайта түсеміз. Тілі биік елдің тұғыры да биік болары сөзсіз.
Сиез Сұлтанбек,
Шымкент қаласының қылмыстық істер жөніндегі ауданаралық сотының бас маман — сот отырысының хатшысы.
