Қазақстанда алғаш рет Шымкент қаласының Елтай және Таскен шағын аудандарында әмбебап жедел қызметтер кешендері ашылды. Олардың бірегей ерекшелігі – бір аумақта өртке қарсы қызмет, жедел медициналық жәрдем және полиция бөлімшелерінің орналастырылуы болып табылады. Жобалар «Аумақтарды дамыту жоспары» аясында жүзеге асырылып, тұрғындардың қауіпсіздігін қамтамасыз етуге бағытталған инфрақұрылымды жаңартудың жарқын үлгісі болды.
Салтанатты ашылу рәсімдеріне Төтенше жағдайлар министрі, генерал-лейтенант Шыңғыс Әрінов, Шымкент қаласының әкімі Ғабит Сыздықбеков, азаматтық қорғау ардагерлері, Полиция департаменті мен Денсаулық сақтау басқармасының басшылығы, ТЖ департаментінің жеке құрамы және өзге де құрметті қонақтар қатысты.
Жергілікті бюджет есебінен салынған әмбебап кешендер алты айдың ішінде бой көтерді. Мұнда 50-ге дейін қызметкер еңбек етеді, ал әр кешен екі өрт сөндіру көлігін орналастыруға есептелген.
Ғимарат заманауи қауіпсіздік пен жайлылық талаптарына сай жобаланған: бір қабатты нысанда қызметтік бөлмелер, ГТҚҚ бекеті, асхана және оқу сыныбы бар. Құтқарушыларды даярлауға арналған оқу мұнарасы мен спорт алаңы қарастырылған. Сондай-ақ полиция және жедел медициналық жәрдем қызметкерлеріне арналған жеке бөлмелер мен олардың техникасын қоюға арналған жайлар бар.
Министр жаңа кешен қызметкерлеріне символикалық кілттерді табыстап, бөлімшелердің жедел кезекшілікке толық дайын екенін атап өтті.
Айта кетейік, осы жылдың соңына дейін Сауле шағын ауданында, ал 2026 жылдың басында Бозарық-3 шағын ауданында осындай кешендердің құрылысы аяқталады. 2026 жылы Ынтымақ, Базарқақпа, Қайнарбұлақ, Шымсити, Жаңаталап және Ақжар шағын аудандарында тағы алты нысан салу жоспарлануда.
