Астана қаласында SEN форумы – Қазақстанның әйел кәсіпкерлерінің жыл сайынғы Ұлттық слеті жоғары деңгейде өтті. Бұл бірегей іс-шара елдің барлық өңірінен жиналған ең белсенді, жігерлі, табанды және шабыт беретін әйелдерді бір алаңға тоғыстырған нағыз үлкен мереке болды.
Түркістан облысының Кәсіпкерлер палатасы атынан слетке Іскер әйелдер кеңесінің төрайымы Салтанат Ходжа-Мамедова және аудандық кеңес төрайымдары – өңірдің 20-дан астам белсенді қатысушысы қатысып, өңір намысын лайықты қорғап қайтты. Салтанат Ходжа-Мамедованың бастамалары әйелдердің кәсіпкерлік қабілетін арттыруға, олардың экономикалық белсенділігін күшейтуге бағытталған маңызды ұсыныстарымен ерекшеленді. Бұл – Түркістан облысының әйелдер кәсіпкерлігі саласындағы рөлінің күн санап артып келе жатқанын тағы бір мәрте айқындады.
Айта кетейік, биыл Іскер әйелдер кеңесінің құрылғанына 11 жыл толды. Осы уақыт ішінде Кеңес өңірдегі мыңдаған кәсіпкер әйелге қолдау көрсетіп, олардың кәсібін дамытуға, жаңа бастамаларды іске асыруға және қоғамдағы рөлін нығайтуға зор үлес қосты. Бұл сенімділік пен бірліктің, еңбектің және табандылықтың нәтижесі.
SEN форумы – тек пікір алмасу ғана емес, қуатты энергия мен жаңа мүмкіндіктер алаңы. Мұндай ауқымды кездесулер әйелдердің Қазақстан экономикасын дамытудың алдыңғы сапында тұрғанын, жаңа жобалар жасап, болашаққа батыл қадам басып келе жатқанын дәлелдейді.
Түркістан облысы кәсіпкерлер палатасының директоры Асылан Ибадуллаев іс-шараның маңызын атап өтті:
«Бүгінгі форум – әйелдердің кәсіпкерлік әлеуеті қандай үлкен күшке ие екенін айқын көрсетті. Біздің өңірдің іскер әйелдері тек өз кәсібін дамытып қана қоймай, экономикаға серпін беріп, әлеуметтік бастамалардың көшбасшысы болып отыр. Палата әрбір кәсіпкер әйелдің бастамасын қолдауға және олардың өсуіне жағдай жасауға әрқашан дайын», – деді ол.
