Шымкент қаласы Абай ауданында инженерлік инфрақұрылымды жаңарту және тұрғын үй аулаларын абаттандыру бағытындағы жұмыстар кезең-кезеңімен жүзеге асырылып келеді. Қала әкімінің тапсырмасына сәйкес, «Asar House» тұрғын үй кешенінің тұрғындарының өтініші негізінде А-2 магистралдық трассасынан тұрғын үй аулаларына кіріп-шығуға қолайлы жағдай жасау мақсатында тас жолға асфальт қабаты төселді.
Аталған нысандағы жұмыстар тұрғындар үшін аса маңызды әлеуметтік мәселені шешті. Бұған дейін тұрғындар топырақты жолмен қатынап, жаңбыр мен қарлы күндері жүріп-тұрудың қиындығын жиі көтеріп келген болатын. Енді жаңа асфальт қабаты төселген соң көлік қозғалысы реттеліп, тұрғындардың күнделікті қатынасы әлдеқайда ыңғайлы әрі қауіпсіз бола түсті.
Жол инфрақұрылымын дамыту – аудан әкімдігі қызметінің басым бағыттарының бірі. Инженерлік желілер мен көше-жол жүйесін жаңғырту жұмыстары тұрғындардың өмір сүру сапасын арттыруға, қала экожүйесін жақсартуға және «Таза Қазақстан» тұжырымдамасының мақсаттарын орындауға негізделген. Бұл тұрғыда жол салу және жөндеу істерімен қатар, аулаішілік аумақтарды жарықтандыру, санитарлық тазалау мен көгалдандыру жұмыстары қатар жүргізілуде.
Абай ауданы әкімдігі тұрғындармен кері байланыс орнатып, олардың ұсыныс-пікірлерін ескеруді басты қағида етіп ұстанады. «Asar House» тұрғындары да өз ықыластарын білдіріп, инфрақұрылымды дамыту бағытындағы жұмыстарға ризашылықтарын жеткізді. Олар бұл өзгерістер тұрғындарға қолайлы орта қалыптастырып, аула аумағының көркі мен тазалығын арттырғанын атап өтті.
Сонымен қатар, аудан аумағында экологиялық мәдениетті қалыптастыру және тұрғындардың тазалыққа деген жауапкершілігін арттыру бағытында түсіндіру жұмыстары жүйелі түрде жүргізілуде. «Таза Қазақстан» акциясы аясында сенбіліктер өткізіліп, көшелер мен көпқабатты үйлердің маңайы тазартылып, көгалдандыру шаралары тұрақты сипат алды.
Абай ауданы әкімдігі алдағы уақытта да қала әкімінің тапсырмаларын басшылыққа ала отырып, инфрақұрылымдық және абаттандыру бағытындағы жобаларды кезең-кезеңімен жүзеге асыруды жалғастырмақ. Мұндағы басты мақсат – тұрғындарға қолайлы, таза әрі қауіпсіз өмір сүру ортасын қалыптастыру.
