25 қазан – Республика күні қарсаңында Түркістан облысы Ордабасы ауданының Қараспан ауылдық округіне қарасты Жұлдыз, Мәдениет және Ынтымақ ауылдарында көптен күткен таза ауыз су жүйесі пайдалануға берілді. Бұл – тұрғындар үшін зор қуаныш пен ел тәуелсіздігінің мерейлі мерекесімен тұспа-тұс келген ерекше оқиға болды.
Сәуір айында басталған жоба мемлекеттік маңызы бар әлеуметтік инфрақұрылымды дамыту бағдарламаларының аясында іске асырылды. Құрылыс жұмыстарының жалпы құны 222,962 миллион теңгені құрайды. Жобаны тәжірибелі мердігер – «Карат-Z» жауапкершілігі шектеулі серіктестігі жүзеге асырған.
Жаңа су жүйесі пайдалануға берілген ауылдарда ұзақ жылдар бойы ауыз су мәселесі шешілмей келген еді. Тұрғындар жаздың аптап ыстығында да, қыстың суығында да тіршілік нәрін тасып ішіп келген. Енді бұл мәселе түбегейлі шешімін тауып отыр. Жоба нәтижесінде үш ауылдағы мыңнан астам отбасы таза, сапалы ауыз суға қол жеткізді.
Салтанатты ашылу рәсіміне аудан әкімі Азат Оралбаев, аудандық мәслихаттың төрағасы Бақдәулет Жұмабеков, аудан прокуроры Абзал Қыдырбай, сондай-ақ ауыл тұрғындары мен ақсақалдар қауымы қатысты. Шара барысында аудан басшысы елді мекендерді дамыту – өңірдің әлеуметтік және экономикалық тұрақтылығының негізгі кепілі екенін атап өтті.
– Бүгінгі қуаныш – тұрғындардың өмір сапасын арттыруға бағытталған нақты істердің нәтижесі. Ел Президенті айқындаған «Әділетті Қазақстан» қағидаты бүгінде іс жүзінде жүзеге асып келеді. Мемлекетке қайтарылған активтер халықтың игілігіне жұмсалып, осындай әлеуметтік нысандар салынуда. Бұл – заң үстемдігі мен әділдіктің өмірдегі шынайы көрінісі, – деді аудан әкімі Азат Оралбаев.
Ауыл ақсақалдары өз кезегінде мемлекет қамқорлығына ризашылықтарын білдіріп, елді игілікке бастаған азаматтарға батасын берді. Тұрғындар үшін бұл тек су жүйесінің іске қосылуы ғана емес, сонымен қатар мемлекет пен қоғам арасындағы сенімнің нығаюы, ел болашағына деген үміттің жаңғыруы деп бағаланды.
Айта кетейік, бұл ауыз су құрылысы – мемлекетке қайтарылған активтер есебінен жүзеге асырылған Ордабасы ауданындағы екі әлеуметтік жобаның бірі. Мұндай жобалар – заңдылық пен әділдіктің нақты нәтижесі. Қайтарылған қаражаттың халықтың тұрмысын жақсартуға бағытталуы ел дамуының жаңа кезеңін айқындайды.
Жобаны іске асыру барысында барлық санитарлық және техникалық талаптар сақталған. Су көздері зерттеліп, заманауи сүзгілеу және тарату жүйелері орнатылған. Қазіргі таңда ауыл әкімдіктері мен коммуналдық қызметтер су жүйесінің үздіксіз жұмысын қамтамасыз ету және техникалық қызмет көрсету бойынша жоспарлы шараларды қолға алған.
Бұл бастама – Түркістан облысының ауылдық аймақтарын инфрақұрылымдық жаңғыртудың нақты көрінісі. Өңірде соңғы жылдары ауыз су, электр, жол және газбен қамту бағытында жүздеген жоба жүзеге асып келеді. Мемлекет тарапынан «Өңірлерді дамыту», «Ауыл – ел бесігі», «Таза су» бағдарламалары аясында атқарылып жатқан жұмыстардың барлығының түпкі мақсаты – ауыл тұрғындарының өмір сапасын арттыру және әлеуметтік әділеттілікті қамтамасыз ету.
Жұлдыз, Мәдениет және Ынтымақ ауылдарындағы жаңа су жүйесінің іске қосылуы – өңір дамуының жарқын мысалы. Бұл жобалар халыққа қолайлы өмір сүру жағдайларын жасап қана қоймай, ауыл шаруашылығын дамытуға, жас отбасыларды елді мекендерде тұрақтандыруға және жергілікті экономиканың жандануына жол ашады.
