Мемлекеттік тіл – ұлттың рухы, елдің ең басты нышаны. Тіл – халықтың тарихы, мәдениеті мен дүниетанымының айнасы. Сондықтан мемлекеттік тілді дамыту мен насихаттау – әрбір азаматтың қасиетті борышы және ел алдындағы жауапкершілігі.
Қазақстан Республикасының Конституциясының 7-бабының 1-тармағында: «Қазақстан Республикасының мемлекеттік тілі – қазақ тілі» деп нақты көрсетілген. Бұл норма тек заңдық қағида ғана емес, мемлекеттілігіміздің өзегі, тәуелсіздігіміздің басты белгісі болып табылады. Мемлекеттік тілдің мәртебесін арттыру – елдің бірлігін, рухани тұтастығын сақтаудың басты кепілі.
Сот жүйесінде мемлекеттік тілдің қолданысын кеңейту – азаматтардың құқықтық мәдениетін қалыптастыруда ерекше маңызға ие. Сот ісін жүргізуде тілге құрмет – әділдікке құрмет. Азаматтар өз істерінің мемлекеттік тілде қаралғанын, өздерінің құқықтары мен міндеттерін түсінгенін қалайды. Сондықтан сот төрелігін жүзеге асыру кезінде мемлекеттік тілді қолдану – заңдылық пен әділдіктің ажырамас бөлігі.
Судья үшін мемлекеттік тілді жетік меңгеру – кәсіби мәдениеттің және азаматтық жауапкершіліктің көрсеткіші. Сот шешімдері, қаулылар мен үкімдер халыққа түсінікті, анық тілмен жазылғанда ғана қоғамда әділдікке деген сенім артады.
Мемлекеттік тілді құрметтеу арқылы біз халыққа жақындаймыз, қоғаммен байланысымызды күшейтеміз.
Тілдің тағдыры – ұлттың тағдыры. Мемлекеттік тілге деген сүйіспеншілік бала жастан басталып, отбасы мен білім беру жүйесінде қалыптасуы тиіс. Әрбір ата-ана өз баласына ана тілін сүюді үйретсе, ол бала ертең елінің патриоты болып өседі.
Қазіргі таңда мемлекеттік тілдің қолданылу аясын кеңейту бағытында мемлекет тарапынан көптеген шаралар атқарылуда. «Тіл туралы» заң, тіл саясаты бағдарламалары, мемлекеттік мекемелерде қазақ тілінде іс жүргізуді арттыру – барлығы да ұлттық болмысымызды сақтап, тілімізді заман талабына сай дамытуға бағытталған.
Тілге деген құрмет – елге деген құрмет. Мемлекеттік тілді білу – тек мемлекеттік қызметкер үшін емес, әрбір қазақстандық үшін абырой. Тілді құрметтеу – рухани тәуелсіздіктің белгісі.
Сот жүйесінде мемлекеттік тілдің қолданылуы мен дамуы – әділ сот төрелігін қамтамасыз етудің, халық сенімін арттырудың маңызды тетігі. Сол себепті әрбір судья мен мемлекеттік қызметкер тіл мәдениетінің үлгісін көрсетіп, мемлекеттік тілдің мәртебесін көтеруге өз үлесін қосуы тиіс.
Мемлекеттік тілді насихаттау – ұлт болашағына қызмет ету.
Тілімізді құрметтеп, оны өміріміздің барлық саласында қолдану – келешек ұрпаққа үлгі, мәңгілік елдің іргесін бекітудің кепілі.
Қ.САПАР,
Шымкент қаласы кәмелетке толмағандардың істері жөніндегі мамандандырылған ауданаралық сотының судьясы.
