Шымкент қаласының Абай ауданында қала әкімі өткізген көшпелі кездесу барысында тұрғындар тарапынан көтерілген мәселелер негізінде инженерлік инфрақұрылым мен тұрғын үй-коммуналдық шаруашылықты дамыту, экожүйені жақсарту және қоршаған ортаны қорғау бағытында нақты жұмыстар қолға алынды.
Кездесуге аудан әкімінің орынбасары қатысып, тұрғындардың ұсыныстарын тыңдап, олардың шешілу жолдарын егжей-тегжейлі талқылады. Әсіресе Түркістан көшесінің бойындағы бұрынғы балабақша орнына қатысты мәселе ерекше назарға алынды. Тұрғындар бұл аумақтың бос жатқанын айтып, оның орнына тұрғындардың демалысына арналған саябақ немесе қоғамдық кеңістік салуды ұсынды.
Қазіргі таңда бұл ұсыныс «Таза Қазақстан» тұжырымдамасы мен қаланы көріктендіру бағдарламасы аясында қарастырылып, аумақты экологиялық жағынан тиімді пайдалану бағытында зерттеу жұмыстары жүргізілуде. Абай ауданы әкімдігі тұрғындармен бірлесіп, инфрақұрылымдық жағдай мен қауіпсіздік талаптарын ескеріп, жобалық шешімдерді пысықтауда. Бұл бастама тек демалыс орнын құру емес, экожүйені жандандыру мен жасыл кеңістікті көбейтуге бағытталған.
Сонымен қатар, қала әкімінің көшпелі қабылдауында Самал-3 шағын ауданындағы Сазтөбе және Қазақ ордасы көшелерінің тұрғындары да инфрақұрылымдық және коммуналдық мәселелерді көтерді. Атап айтқанда, жол жабындысын жөндеу, көше жарығын орнату, арық жүйелерін қалпына келтіру және санитарлық тазалықты қамтамасыз ету мәселелері күн тәртібіне енгізілді. Қазіргі уақытта бұл бағыттар бойынша жобалық-сметалық құжаттар әзірленіп, бірқатар жұмыстар басталып кетті.
Ақжайық шағын ауданындағы Ипподромная көшесінің тұрғындары да коммуналдық жағдайға байланысты өз өтініштерін білдірді. Олар су жүйесін реттеу, жолдарды тегістеу және қоғамдық көлік қатынасын жақсарту жөнінде пікірлер айтты. Аудан әкімдігі мен тиісті басқармалар тарапынан бұл мәселелер назарға алынып, кезең-кезеңімен шешу жоспарына енгізілді.
Абай ауданы аумағында инженерлік инфрақұрылымды дамыту мен экологиялық ахуалды жақсарту қатар жүргізілуде. «Таза Қазақстан» тұжырымдамасы аясында ауданның көшелері мен аулаларында санитарлық-тазалық, көгалдандыру және абаттандыру жұмыстары тұрақты түрде атқарылып келеді. Әкімдік тарапынан тұрғындар арасында тазалық мәдениетін қалыптастыру, тұрмыстық қалдықтарды сұрыптау, жасыл аймақтарды қорғау туралы түсіндіру және ақпараттық сүйемелдеу жұмыстары жүйелі жүргізілуде.
Қоршаған ортаны қорғау және экологиялық сана қалыптастыру — ауданның даму стратегиясының ажырамас бөлігі. Бұл бағытта мектептер мен жастар ұйымдарының қатысуымен экологиялық акциялар, сенбіліктер мен ағаш отырғызу шаралары ұйымдастырылып тұрады.
Қала әкімінің тапсырмасына сәйкес, Абай ауданы әкімдігі тұрғындармен кері байланысты нығайтып, әрбір көтерілген мәселені бақылауға алуда. Түпкі мақсат — тұрғындарға жайлы, қауіпсіз және экологиялық таза орта қалыптастыру.
Тазалық — тәртіп пен мәдениеттің айнасы. Сол себепті аудан әкімдігі инженерлік-инфрақұрылымдық даму мен экологиялық мәдениетті қатар дамытуды жалғастыра отырып, «таза аудан – жайлы қала» қағидасын жүзеге асыруды басты бағыт ретінде айқындап отыр.
