Бүгін Шымкент қаласында Бүкіләлемдік тазалық күніне орай кең көлемде ұйымдастырылған жалпықалалық сенбілік өтті. Табиғатты қорғау, экологиялық мәдениетті арттыру және қала тазалығын сақтау мақсатында өткізілген іс-шараға мыңдаған тұрғын мен түрлі мекеме өкілдері қатысты.
Абай ауданы аумағында өткен сенбілік барысында ауданның тазалық жұмыстарына айрықша көңіл бөлінді. Шараға Абай ауданы әкімінің аппараты мен «Абай» көпсалалы коммуналдық мемлекеттік мекемесінің қызметкерлері, сондай-ақ KazStroiCapital жауапкершілігі шектеулі серәктестігінің мамандары белсенді түрде атсалысты. Сонымен қатар Шымкент қаласының әлеуметтік қорғау, Мәдениет, Туризм, сыртқы байланыстар және креативті индустрия басқармалары мен Транспорт және ауыл шаруашылық басқармалары мен қалалық жоғары оқу орындарының оқытушылары мен студенттері де бірлесе еңбек етті.
Сенбілік аясында аудан аумағындағы көшелер мен аулалар, жаяу жүргіншілер жолдары, арық-атыздар мен қоғамдық орындар күл-қоқыстан тазартылды. Сондай-ақ жасыл аймақтарды күтіп-баптау, ағаш бұтақтарын қырқу, гүлзарлар мен көгалдарды ретке келтіру, тұрмыстық қалдықтарды шығару жұмыстары жүргізілді. Қатысушылар бір күн бойы қаланың көркін арттыруға өз үлестерін қосып, экологиялық мәдениетті насихаттаудың жарқын үлгісін көрсетті.
Мұндай іс-шаралар – қала тұрғындарының табиғатқа деген жауапкершілігін арттырып, қоршаған ортаны аялау мәдениетін қалыптастырудың маңызды тетігі. Абай ауданы әкімі аппаратының өкілдері сенбіліктің басты мақсаты – қоғамда экологиялық сана мен ұжымдық жауапкершілік сезімін күшейту екенін атап өтті.
— Тазалықты сақтау тек коммуналдық қызметтің емес, баршамыздың ортақ міндетіміз. Табиғатты қорғау мен қала аумағын таза ұстау – әрбір азаматтың борышы. Осындай сенбіліктер арқылы тұрғындар арасында табиғатқа жанашырлық көзқарас қалыптасады, — деді аудан әкімдігі өкілі.
Қатысушылардың бірі сенбіліктің жоғары деңгейде ұйымдастырылғанын айтып, мұндай игі бастамалар жастарға үлкен тәрбие беретінін атап өтті. “Біз, жастар, қоршаған ортаны қорғау мәдениетін өзімізден бастауымыз керек. Әрбір отырғызылған ағаш, әрбір тазаланған аумақ — болашақ ұрпаққа қалдырған аманат,” — деді студенттер тобының жетекшісі.
Күннің екінші жартысында сенбілікке қатысушылар өздеріне бекітілген аумақтарды толықтай ретке келтіріп, қалдықтарды арнайы техника арқылы шығарып отырды. Нәтижесінде Қайнарбұлақ, Игілік, Жаңаталап және басқа да тұрғын алаптар тазарып, көріктене түсті.
Абай ауданы аумағында мұндай сенбіліктер тұрақты түрде ұйымдастырылып келеді. Бұл тек тазалықты сақтау шарасы ғана емес, тұрғындар арасындағы бірлік пен ортақ мақсатқа жұмылудың көрінісі.
Табиғатқа жанашырлық — ортақ жауапкершілік. Әр азамат өз ауласынан, өз көшесінен тазалықты бастаса, туған қаламыз да, еліміз де көркейе түседі. Тазалық — тәртіптің, мәдениеттің және өркениетті қоғамның айнасы. Жасалған әрбір игі іс — болашаққа қалдырған аманат.
