Бүгін, Түркістан облысы кәсіпкерлер палатасында, қоғамдық тамақтану саласы өкілдеріне тағам өнімдерінің қауіпсіздігі мен қоғамдық денсаулықты сақтау мәселелері жөнінде семинар өтті.
Іс-шараның басты мақсаты – өңірде тағамнан уланудың, әсіресе ботулизмнің алдын алу және қоғамдық тамақтану саласында жұмыс істейтін кәсіпкерлерге санитариялық-эпидемиологиялық талаптарды түсіндіру.
Семинарға қоғамдық тамақтану орындарының иелері мен қызметкерлері, санитариялық-эпидемиологиялық бақылау департаментінің мамандары және палата өкілдері қатысты.
Арнайы мамандар кәсіпкерлерге Қазақстан Республикасы Денсаулық сақтау министрінің 2022 жылғы 17 ақпандағы № ҚР ДСМ-16 бұйрығымен бекітілген «Қоғамдық тамақтану объектілеріне қойылатын санитариялық-эпидемиологиялық талаптар» қағидалары бойынша түсініктеме беріп, негізгі талаптарға тоқталды.
Семинар барысында мына мәселелерге ерекше назар аударылды:
• нысан салынатын жер телімін дұрыс таңдау (зираттарға, мал қорымдарына немесе радиациялық қауіпті аумақтарға жақын орналасуына жол берілмейді);
• ғимараттардың сумен, жылумен жабдықталуы, желдету және ауа баптау жүйелері талаптарға сай болуы;
• тағам өнімдерін қабылдау, сақтау, қайта өңдеу және өткізу тәртібі (ботулизмді тудыратын Clostridium botulinum бактериясы көбіне дұрыс сақталмаған немесе консервіленген тағамдардан таралады);
• тағам қалдықтарын жинау мен жою тәртібі;
• санитариялық тораптар мен қол жууға арналған жабдықтардың болуы.
Кәсіпкерлерге сапасыз және қауіпті өнімдердің сауда айналымына түсуіне жол берілмейтіні ескертілді. Саудаға шығаруға болмайтын өнімдер қатарына: жарамдылық мерзімі көрсетілмеген немесе мерзімі өтіп кеткен өнімдер; таңбалауында сақтау шарттары мен шығу тегі көрсетілмеген өнімдер; тағаммен жанасуға арналмаған қаптамадағы өнімдер және сапасыздық белгілері бар өнімдер жатады.
Сондай-ақ нысан аумағының тазалығы мен абаттандырылуы да басты талаптардың бірі екені айтылды. Санитариялық қағидаларға сәйкес, стационарлық нысандарда жаңбыр суларын ағызу жүйесі толық жұмыс істеуі, объект аумағы әрдайым таза болуы, қоқыс урналары орнатылып, уақытылы тазартылып отыруы тиіс. Бұл талаптардың барлығы инфекциялық аурулардың таралуын болдырмауға бағытталған.
Семинар соңында кәсіпкерлер мамандарға сұрақ қойып, тәжірибелерімен бөлісті. Түркістан облысы кәсіпкерлік палатасының өкілдері мұндай түсіндіру жұмыстары алдағы уақытта да жалғасын табатынын хабарлайды.
