«AMANAT» партиясы Түркістан облыстық филиалы жанындағы экономика, кәсіпкерлік және аграрлық сектор мәселелері жөніндегі кеңестің отырысы өтті. Жиында Сауран және Ордабасы аудандарында атқарылып жатқан жұмыстар сараланып, агроөнеркәсіптік кешенді дамытуға қатысты ұсыныстар айтылды.
Кеңесте Мемлекет басшысының Жолдауындағы ауыл шаруашылығын инновациялық бағытқа көшіру міндеттері сөз болды. Мәслихат депутаты, кеңес төрағасы Ғани Райымбеков ауыл шаруашылығы – тек экономикалық емес, ұлттық мәселе екенін атап өтті.
Жиынға қатысқан Түркістан облысы кәсіпкерлер палатасының директоры Асылан Ибадуллаев:
«Ауыл шаруашылығы – біздің өңірдің басты артықшылығы. Бұл салада жаңа технологияларды енгізіп, инвестициялық жобаларды іске асыру арқылы ғана шаруалардың табысын арттырып, аймақтың экономикасын көтере аламыз», – деді.
Сауран және Ордабасы аудандарының әкім орынбасарлары жоспарлы индикаторлардың орындалу барысын баяндап, ауыл шаруашылығы жерлерін айналымға тарту, ауыспалы егісті ұлғайту, ылғал үнемдеу технологияларын енгізу, жылыжай алаңдарын кеңейту және техника паркін жаңарту бағыттарында жеткен нәтижелерін ұсынды.
Жалпы, аграрлық сектордың дамуы Түркістан облысының өркендеуі мен азық-түлік қауіпсіздігін қамтамасыз етудің негізгі кепілі екені айтылды. Кеңесте ұсыныстар хаттамаға енгізіліп, бақылауға алынды.
