Түркістан қаласында «Түркістан – Ұлы Жібек жолындағы халықаралық ынтамақтастық орталығы» тақырыбында жергілікті өзін-өзі басқару органдарының екінші ынтымақтастық форумы өтіп жатыр.
Алғашқы «Орталық Азия – Корея» форумы былтыр Корея Республикасында өткен болатын. Биылғы кездесу осы маңызды миссияның жалғасы ретінде тәжірибе алмасуға және нақты шешімдер қабылдауға мүмкіндік беретін алаңға айналды.
Форум жұмысына Корея және Орталық Азия елдерінің, сондай-ақ еліміздің өзге өңірлерінің делегациясы қатысты. Қатысушылар қатарында Корея Республикасының Қазақстандағы елшісі Чжо Тэ Ик, «GAROK» қауымдастығының бас хатшысы Ю Мин Бон, Қырғызстан Республикасы Министрлер кабинеті жанындағы Мемлекеттік қызмет және жергілікті өзін-өзі басқару істері жөніндегі мемлекеттік агенттіктің жергілікті өзін-өзі басқаруды дамыту басқармасының басшысы Джээнбаев Бактыярбек, «Woosong University Kazakhstan» университетінің директоры Чон Ёнг Хва және басқа да халықаралық сарапшылар болды.
Алдымен, халықаралық форум аясында Түркістан облысының инвестициялық мүмкіндіктері таныстырылды.
Форумда Түркістан облысының әкімі Нұралхан Көшеров сөз алып, аймақтың стратегиялық әріптестікті нығайтуға, өңіраралық байланысты кеңейтуге және бірлескен бастамаларды іске асыруға дайын екенін атап өтті.
Түркістан облысы кәсіпкерлер палатасының директоры Асылан Ибадуллаев бұл форумды жаңа мүмкіндіктерге жол ашатын маңызды алаң деп бағалады:
«Орталық Азия мен Корея елдерінің ынтымақтастығы – экономикалық қана емес, мәдени және білім салаларындағы байланысты да тереңдетуге ықпал ететін үлкен қадам. Біз кәсіпкерлер үшін жаңа жобаларға, инвестиция тартуға және тәжірибе алмасуға нақты мүмкіндіктер ашылып отырғанын көріп отырмыз», – деді ол.
