2025 жылдың 6 қыркүйек күні «Таза Қазақстан» экологиялық акциясы аясында Шымкент қаласы Абай ауданына қарасты Шымкентсити шағынауданында ауқымды жалпықалалық сенбілік өтті. Игі бастама Абай ауданы әкімдігінің ұйымдастыруымен және «Абай» коммуналдық мемлекеттік мекемесінің қызметкерлерінің белсенді қатысуымен жүзеге асырылды.
Сенбілік барысында шағынаудан аумағында жинақталған тұрмыстық және құрылыс қалдықтары арнайы техникалардың көмегімен тазартылып, стихиялық қоқыс орындары жойылды. Сонымен қатар, қоғамдық орындар мен жаяу жүргінші жолдары бойындағы арамшөптер орып алынып, санитарлық жағдай едәуір жақсартылды.
Іс-шараға коммуналдық мекемелермен қатар аудан тұрғындары, еріктілер, ПИК өкілдері мен белсенді жастар да атсалысты. Жиналғандардың ортақ күшімен жалпы аумағы 6 гектардан астам жер тазартылып, 40 тоннаға жуық қоқыс арнайы полигондарға шығарылды. Сонымен бірге, 1500 шаршы метр жасыл желек аумағына күтім жасалып, ағаштар әктеліп, суарылды.
Сенбіліктің басты мақсаты – тек тазалық жұмыстары ғана емес, сонымен бірге қоғамда экологиялық мәдениетті арттыру, қоршаған ортаға деген жауапкершілікті қалыптастыру болып табылады. Осы тұрғыда ұйымдастырылған акция тұрғындардың белсенділігін оятып, ортақ іске деген ынтымақтастықты нығайтты.
Абай ауданы әкімдігі қоршаған ортаны қорғау бағытындағы осындай экологиялық шаралар алдағы уақытта да өз жалғасын табатынын атап өтті. Жыл соңына дейін ауданда бірнеше рет сенбіліктер, ағаш отырғызу акциялары, тазалық айлықтары және экологиялық тренингтер өткізу жоспарланған.
Экологиялық қауіпсіздік пен таза қоршаған орта – әрбір азаматтың өмір сапасының негізі. Сондықтан аудан басшылығы мұндай игі істерге барлық тұрғындарды белсенді атсалысуға шақырады. «Таза қала – таза қоғам» қағидасын берік ұстанған Абай ауданы ұжымы қоршаған ортаға ұқыпты қарау – болашақ ұрпақ алдындағы борышымыз деп санайды.
