Жиынға Кеңес мүшелерімен бірге Түркістан облысы жер ресурстарын басқару департаменті мен жер қатынастары басқармасының өкілдері, облыстық прокуратура, қала және аудан әкімдіктерінің жауапты мамандары, сондай-ақ өңір кәсіпкерлері қатысты.
Кеңес отырысында жергілікті атқарушы органдардың ресми сайттарына жер учаскелерінің орналастыру заңнамасының орындалуы, жеке кәсіпкердің жер теліміне байланысты туындаған мәселесі мен ауыл шаруашылығы жерлерін нысаналы пайдалану барысы қаралды. Сондай-ақ, баяндамашылар жер қатынастары саласындағы бірқатар кемшіліктерді атап өтті. Мәселен, кейбір аудандық және қалалық әкімдіктерде бас жоспарлар мен инженерлік коммуникациялар схемалары уақтылы жарияланбайтыны белгілі болды.
Жиын соңында арнайы комиссия жұмысының нәтижелері жарияланып, нақты ұсыныстар қабылданды. Бұған дейін маусым айында өткен алғашқы отырыстың шешімі бойынша 20 шаруа қожалығының құжаттары қаралып, оның 13-і мақсатты пайдаланушы, 5-і мақсатсыз пайдаланушы деп танылып, 3-і қайта зерделеуге жолданған еді. Осыған байланысты Жер ресурстарын басқару департаментіне құжаттарды уақытылы облыстық басқармаға жолдау және соттағы талап арыздарды прокуратура келісімімен кері қайтарып алу тапсырылды. Сондай-ақ Жер қатынастары басқармасына комиссия отырыстарын жүйелі түрде өткізу міндеттелсе, прокуратураға арнайы комиссия жұмысына бақылауды күшейту әрі кінәлі лауазымды тұлғалардың жауапкершілігін қарастыру ұсынылды.
Кеңес төрағасы Орынбасар Кабиштаев жиынды қорытындылай келе: «Президент Қасым-Жомарт Тоқаев атап өткендей, жерді заңсыз иеленіп, пайдаланбай отырғандардан мемлекетке қайтару қажет. Ал адал еңбек етіп, ауылды көркейтіп отырған кәсіпкерлердің жұмысына кедергі келтірілмеуі тиіс. Кеңестің бүгінгі шешімдері осы бағытта нақты іске асуы үшін тұрақты бақылауға алынады», – деді.
