Түркістан облысы кәсіпкерлер палатасы мен «ҚазАгроҚаржы» АҚ бірлесіп ашық есік күнін өткізді. Іс-шара аясында аграрлық сала кәсіпкерлеріне қолжетімді мемлекеттік бағдарламалар таныстырылып, ауыл шаруашылығына қажетті заманауи техникалар табысталды.
Жиынның алғашқы бөлігінде «ҚазАгроҚаржы» АҚ мамандары фермерлерге мемлекеттік бағдарламалар арқылы қаржыландыру мүмкіндіктерін түсіндіріп, онлайн өтінім қабылдау жүйесі таныстырылды. Ал екінші форматта алынған техникалардың жәрмеңкесі ұйымдастырылып, шаруаларға ресми түрде кілттері табысталды.
Көрмеге ауыл шаруашылығы техникасын жеткізуші серіктес компаниялар қатысты. Олардың қатарында «Агромаш Ловол», «Вираж», YTO, NSA мини комбайн, МТЗ КЗ және KazKioti бар.
Іс-шарада сонымен бірге «Аграрлық несие корпорациясы» АҚ Түркістан облыстық филиалының директоры Бақытжан Күлсінбаев кәсіпкерлерге мемлекеттік қолдау тетіктерінің тиімділігі мен рәсімдеу жолдарын түсіндіріп өтті.
Маңызды шара барысында Түркістан облысы кәсіпкерлер палатасы мен «ҚазАгроҚаржы» АҚ арасында ынтымақтастық туралы меморандумға қол қойылды. Құжат аясында тараптар ауыл кәсіпкерлеріне жан-жақты қолдау көрсетуді, бағдарламалар бойынша ақпараттық-түсіндіру жұмыстарын жүргізуді және жобаларды ресми құжаттар деңгейінде сүйемелдеуді көздеп отыр.
Түркістан облысы кәсіпкерлер палатасы директорының орынбасары Бақытжан Құралбаев өз сөзінде бұл қадамның маңызын атап өтті:
– «Ауыл кәсіпкерлерінің негізгі сұранысы – қолжетімді техника мен тиімді қаржыландыру. Бүгінгі меморандум арқылы біз фермерлердің өтінімдерін рәсімдеу мен сүйемелдеуді жеделдетеміз. Бұл өз кезегінде кәсіпкерлердің уақытын үнемдеп, мемлекеттік қолдау құралдарына қол жеткізуін жеңілдетеді», – деді ол.
Жиын соңында мемлекеттік бағдарламалар аясында ауыл шаруашылығы техникаларын алған кәсіпкерлерге жаңа техникалардың кілттері салтанатты түрде табыс етілді.
