Шымкент қаласының қылмыстық істер жөніндегі мамандандырылған ауданаралық сотымен ҚР ҚК-нің 24-бабы 3-бөлігі арқылы 99-бабының 1-бөлігімен айыпталған «Ж»-ға қатысты қылмыстық іс ашық сот отырысында қаралды.
Сотта анықталғаны:
21.04.2025 жылы «Ж» «Тұрғын үй Шымкент» ЖШС-нің (әкімге қарасты) директоры бола тұра, алкогольдік ішімдік ішкен масаң күйде болып, туындаған бас араздық салдарынан Шымкент қаласы әкімінің орынбасары «Б»-ні қасақана өлтіруге оқталып, оған аңшы мылтығынан 5 рет оқ атқан. Алайда сотталушыда оқ дәрілері таусылып, жәбірленуші оған қарсылық көрсетіп және оған көмекке қасында болған адамдар келуіне байланысты, «Ж» өзінің қылмыстық ниетін соңына дейін жеткізе алмаған.
Соттың тұжырымы немен қуатталады:
Сотталушының мойындауымен, жәбірленушінің және куәлердің жауаптарымен, заттай дәлелдемелермен, бейнежазбалармен, сот сараптамаларының қорытындыларымен.
Соттың шешімі:
«Ж»-нің қылмыстық жауаптылығы мен жазасын жеңілдететін мән-жай ретінде кінәсін ішінара мойындайтындығы, оған шын көңілден өкінетіндігі, бұрын сотты болмағандығы, асырауында 2 жас баласы бары танылды, ал ауырлататын мән-жайлар ретінде қылмысты алкогольден масаң күйінде жасағаны анықталды.
Осыған байланысты, сот «Ж»-ні ҚК-нің 24-бабы 3-бөлігі арқылы 99-бабының 1-бөлігімен кінәлі деп танып, оған 9 жылға бас бостандығынан айыру түріндегі жаза тағайындады.
Үкім заңды күшіне енбеген
