Қала әкімі Ғабит Сыздықбеков ҚР Бас Прокуроры — Қазақстан спорттық ату федерациясының президенті Берік Асыловпен, сондай-ақ ҚР Ғылым және жоғары білім министрі Саясат Нұрбекпен, ҚР Туризм және спорт министрлігі Спорт және дене шынықтыру істері комитетінің төрағасы Руслан Есеналинмен бірге осы ауқымды спорттық іс-шараның ашылу салтанатына қатысты.
Қала басшысы спортшыларды, жаттықтырушылар мен қонақтарды чемпионаттың басталуымен құттықтап, ұйымдастырушыларға, спорт федерацияларына және турнирді жоғары деңгейде өткізуге күш салған азаматтарға алғысын білдірді.
Айта кетейік, қала әкімдігінің қолдауымен өткізілген чемпионатқа мәртебелі қонақтар жиналды. Олардың қатарында Халықаралық спорттық ату федерациясының президенті Лучано Росси, Азия ату конфедерациясының басшысы шейх Салман Сабах әл-Салем ас-Сабах, әлемдік спорт ұйымдарының өкілдері бар. Олардың қатысуы жарыстың жоғары мәртебесін аңғартады.
16-30 тамыз аралығында «Shymkent Shooting Plaza» базасында 27 елден 800 спортшы «тапанша», «мылтық», «қозғалмалы нысана», «стендтік ату», «трап», «скит» және «скит-микс» бойынша жарысады. Чемпионат аясында 700-ден астам медаль ойналады. Сондай-ақ жарыс екі олимпиадалық спорт түрі бойынша өтеді: нысана көздеу және стенд ату.
Жарыстың мақсаты- атқыштар спортын насихаттау, спортшылардың шеберлігін арттыру, рейтингісін анықтау және жаттықтырушылар мен төрешілердің кәсіби біліктілігін арттыру.
Бұл чемпионат Қазақстандағы спорттық инфрақұрылымның дамуына және елдің халықаралық спорт аренасындағы беделін арттыруға елеулі үлес қосады. Әсіресе, Шымкент қаласы үшін мұндай ауқымды іс-шараны қабылдау – өңірдің спорттық әлеуетін көрсетуге үлкен мүмкіндік. Жергілікті тұрғындар мен қала қонақтары үшін чемпионат қызықты әрі тәрбиелік мәні зор мәдени-спорттық оқиға болмақ.
Сонымен қатар, бұл дода жас спортшыларға тәжірибе жинауға және халықаралық деңгейде өз шеберліктерін сынауға мүмкіндік береді. Турнир барысында экология мен қауіпсіздік талаптары да қатаң сақталып отыр, бұл Шымкенттің әлемдік деңгейдегі спорттық іс-шараларды өткізуге толық қабілетті екенін көрсетеді.
Осы чемпионат аясында түрлі семинарлар мен шеберлік сабақтары ұйымдастырылып, төрешілер мен жаттықтырушылардың тәжірибе алмасуына жағдай жасалды. Бұл өз кезегінде Қазақстандағы спорттық ату мектебінің дамуына серпін береді.
