Бүгін Қызылорда облысынан келген күріш өсіруші кәсіпкерлер Түркістан облысының Отырар ауданындағы «Таймас» шаруа қожалығының жұмысымен танысты.
Шаруашылықтың басты ерекшелігі — 500 гектар жерге күрішті тамшылатып суару әдісімен егуі. Бұл агротехнология суды 60–70%-ға дейін үнемдеуге мүмкіндік береді. Биыл шаруашылықта «Лазер» сорты егілген және мол өнім күтілуде. Күріштен бөлек, мұнда 2000 гектар мақта да тамшылатып суғарылып отыр.
Сапар барысында қызылордалық кәсіпкерлер Түркістан қаласындағы «BNK Агро» ЖШС-не де барып, тамшылатып суаруға арналған қондырғылар мен жабдықтардың өндіріс процесімен танысты.
Түркістан облысы кәсіпкерлер палатасының директоры Асылан Ибадуллаев бұл іссапардың маңыздылығын атап өтті:
«Қазір ауыл шаруашылығында ең үлкен мәселе – су тапшылығы. Түркістан облысындағы шаруашылықтардың тәжірибесі көрсеткендей, тамшылатып суару әдісі өнімділікті арттырып қана қоймай, суды бірнеше есе үнемдеуге мүмкіндік береді. Мұндай тәжірибе алмасу екі өңір кәсіпкерлеріне де тиімді және болашақта бірлескен жобаларға жол ашады», – деді ол.
