2025 жылы Шымкент қаласының Абай ауданында құрылыс саласы айтарлықтай қарқын алды. Қала әкімдігінің және құрылыс басқармасының қолдауымен аудан аумағында тұрғын үй, әлеуметтік нысан және инженерлік инфрақұрылым жобалары белсенді түрде іске асырылуда. Әлеуметтік қамтамасыз ету бағытында биылғы жылы үш маңызды нысан салынып жатыр, оның екеуі жыл соңына дейін пайдалануға берілсе, біреуі келесі жылға өтпелі болып отыр.
Абай ауданында биылғы жылы жалпы құны 104,9 млрд теңгеге 69 жоба аясында 98 нысанның құрылысы қолға алынды. Оның ішінде 62 нысан жыл соңына дейін пайдалануға беріледі деп жоспарланса, бір нысан толық аяқталды. Қалған 35 нысанның құрылысы келесі жылға ауыстырылды. Жобалар аясында аудан көлемінде көпқабатты 57 тұрғын үй салынуда. Бұл үйлердің жалпы аумағы 283,5 мың шаршы метрді құрап, 3 592 пәтерді қамтиды. Биыл олардың ішінде 31 үй (2 412 пәтер, 190,7 мың ш.м.) тұрғындар игілігіне беріледі деп жоспарланған.
Халықтың әлеуметтік әлсіз топтарын қолдау мақсатында нарықтан қосымша 379 пәтер сатып алу жұмыстары жүргізілуде. Еске салсақ, 2024 жылы осы санатқа жататын азаматтар үшін 1 514 пәтер сатып алынған болатын, оның ішінде 1 060 пәтер әлеуметтік осал топтарға, ал 454 пәтер жұмыс істейтін жастарға берілген. Ауданның әр шағынауданында кепілдік мерзіміндегі үйлер бойынша да белсенді жұмыс жүргізілуде. Қазіргі таңда «Тұран-2», «Шымкент сити», «Нұрсәт», «Бозарық» және «Ақжайық» шағынаудандарындағы 197 тұрғын үй (10 562 пәтер) кепілдік бақылауда тұр. 2025 жылдың басынан бері 50 құрылыс кемшілігі анықталып, қалпына келтірілген. Ал 2024 жылы 656 ақау тиісті түрде жойылды.
Құрылыс сапасын қадағалау мақсатында шарт талаптарын орындамаған мердігер мекемелер мен техникалық қадағалаушыларға 2025 жылдың басынан 5,6 млн теңге айыппұл өндірілді. Оның ішінде мердігерлерге – 1,88 млн теңге, техникалық және авторлық қадағалаушыларға – 105 мың теңге, кепілдік мерзімі аясында – 3,75 млн теңге. Сонымен қатар, биыл «Корпорация Сити-строй» ЖШС мемлекеттік сатып алуға жосықсыз қатысушы ретінде танылды.
Абай ауданында апатты және ескі үйлерді жаңарту бағытында реновация бағдарламасы қайта іске қосылды. Қазіргі таңда 113 пәтерді қамтитын 10 апатты үйдің тұрғындарын көшіру жұмыстары жүргізілуде. 2021 жылдан бері аудан аумағындағы көпқабатты 233 тұрғын үйге техникалық зерттеу жүргізіліп, олардың ішінде 68 үй сейсмонығайтуды қажет етеді деп танылған, 67 үй апатты, ал 98 үй тұрақты жағдайда. Қазіргі уақытта бірнеше үйге ҚазҒСҚЗИ мамандары қосымша зерттеу жүргізуде.
Инженерлік инфрақұрылымды дамыту мақсатында 2025 жылы 8 нысанның құрылысы жүргізілуде, оның ішінде 7 нысан жыл соңына дейін аяқталады, 1 жоба келесі жылға өтеді. Сондай-ақ, 22 көпқабатты тұрғын үйге күрделі жөндеу жұмыстары, ал 9 үйдің 17 жедел сатысын ауыстыру жоспарланған.
Білім саласында да ілгерілеу бар: аудан бойынша 17 білім беру нысанының құрылысы жүріп жатыр, оның ішінде 7 жаңа ғимарат (5-і жыл соңына дейін пайдалануға беріледі) және 10 нысан күрделі жөндеуден өтуде. «Жайлы мектеп» ұлттық жобасы аясында 17 300 орынды 12 мектептің құрылысы жүргізіліп, оның 11-і пайдалануға берілді. Қалған бір мектеп (Таскен шағынауданы) биылғы оқу жылының ІІІ тоқсанында тапсырылмақ.
Мәдениет, спорт және денсаулық сақтау саласында да ауқымды жобалар жүзеге асырылуда. Абай ауданында мәдениет нысандары жаңартылып, спорт мектептері мен денсаулық сақтау мекемелерінің құрылысы белсенді жүргізілуде. Сонымен қатар, абаттандыру жобалары аясында саябақтар мен қоғамдық кеңістіктер жаңартылып, тұрғындарға жайлы ортаны қамтамасыз ету жұмыстары жалғасуда.
Түйіндей келе, Абай ауданында құрылыс саласы қарқынды дамып, тұрғын үймен қамту, әлеуметтік инфрақұрылымды дамыту, сейсмологиялық қауіпсіздікті қамтамасыз ету және инженерлік жүйелерді жаңарту бағытында нақты қадамдар жасалуда. Мұндай шаралар аудан тұрғындарының өмір сүру сапасын арттырып, Абай ауданын қауіпсіз әрі жайлы қала ортасына айналдырады.
