2025 жылғы 9 тамыз күні Шымкент қаласының барлық аудандарында бір мезетте «Таза Қазақстан» экологиялық акциясы аясында кең көлемді сенбілік ұйымдастырылды. Бұл игі шараның басты мақсаты – қала тұрғындары арасында экологиялық мәдениетті қалыптастыру, қоршаған ортаны қорғау және санитарлық тазалықты күшейту.
Абай ауданы аумағында сенбілік жұмыстары қарқынды жүргізілді. Атап айтқанда, «Шымисти» шағын ауданында негізгі тазалық жұмыстары қолға алынды. Әл-Фараби көшесі мен өзге де орталық көшелерде жол жиектері мен аяқжолдар тазартылып, ирригациялық жүйелер қоқыстан арылды. Сонымен қатар, арам шөптер шабылып, газондар қырқылды, қураған бұтақтар кесіліп, көшелердегі тазалық толықтай қамтамасыз етілді.
Сенбілікке аудан тұрғындары белсене қатысып, тазалық жұмыстары тек коммуналдық қызметтің емес, бүкіл қоғамның ортақ ісі екенін дәлелдеді. Акцияға 400-ге жуық азамат қатысып, 18 арнайы техника жұмылдырылды. Жиналған қоқыс көлемі 34 тоннаға жетіп, барлығы арнайы полигондарға шығарылды. Бұл көрсеткіш аудан тұрғындарының табиғатты қорғауға деген жоғары жауапкершілігін айқын аңғартады.
Аудан әкімдігі сенбілікке қатысқан тұрғындарға алғысын білдіріп, мұндай шаралардың жүйелі түрде жалғасатынын жеткізді. «Таза орта – әрбір азаматтың денсаулығы мен өмір сапасына әсер ететін маңызды фактор. Сондықтан, бүгінгі сенбілік — тек тазалық шарасы ғана емес, қоғамға экологиялық мәдениетті насихаттау қадамы» деп атап өтті аудан басшылығы.
Сенбілік барысында жастар ұйымдары мен еріктілер де белсенділік танытты. Әсіресе, оқушылар мен студенттердің қатысуы маңызды рөл атқарды. Олар көшелерді қоқыстан тазартып қана қоймай, тұрғындарға экологиялық тәрбие тұрғысында үгіт-насихат жүргізді. Ақ жаулықты әжелер де сенбіліктен шет қалған жоқ. Олар жастарға үлгі болып, табиғатты қорғау – келешек ұрпаққа аманат екенін айтты.
Абай ауданы тұрғындарының айтуынша, мұндай сенбіліктер тек аумақтың санитарлық жағдайын жақсартып қана қоймай, көршілер арасындағы ынтымақты арттырады. Бірге еңбек етіп, бірге тазалық орнатқан тұрғындар болашақта да мұндай шараларға тұрақты қатысуға дайын екендерін жеткізді.
Жалпы алғанда, «Таза Қазақстан» акциясы аясындағы сенбіліктің нәтижесінде Абай ауданында тазалық жұмыстары жүйелі жүргізіліп, тұрғындардың экологиялық жауапкершілігі артқаны байқалды. Бұл игі бастама алдағы уақытта да жалғасын табады.
