Жемқорлық – қоғамның дамуын тежейтін, мемлекет тұтастығына сызат түсіретін ең қауіпті әлеуметтік дерттердің бірі. Ол тек қана экономикалық шығын әкеліп қоймай, халықтың билікке деген сенімін әлсіретеді, әділеттілік пен заң үстемдігіне нұқсан келтіреді. Сондықтан да жемқорлықпен күрес – әрбір азаматтың ортақ борышы, ал оны болдырмау – мемлекеттің стратегиялық мақсаты.
Жемқорлықтың зардабы ұлттың болашағына тікелей әсер етеді. Бұл індет жеке мүддені қоғам мүддесінен жоғары қоюға, адал еңбектің қадірін түсіруге, әділдікті сатып алуға әкеледі. Мұндай жағдайда тек материалдық қана емес, рухани құндылықтар да күйрейді. Әділдік пен парасаттылық жойылған жерде даму болмайды, ал жемқорлықтың тамыры терең жайылған қоғамда әділ сот төрелігі мен халықтың игілігі үшін жасалған заңдар өз күшін жояды.
Қазақстан Республикасының Конституциясында бекітілгендей, мемлекетіміздің ең басты құндылығы – адам және оның құқықтары мен бостандықтары. Ал осы құндылықтардың сақталуы мен қорғалуы үшін заңның үстемдігі, әділ сот жүйесі және жауапты мемлекеттік басқару қажет. Сот жүйесі жемқорлықпен күресте ерекше рөл атқарады. Әрбір қылмыстық істі әділ қарап, кінәліні лайықты жазалау, ал адал азаматтың құқығын қорғау – сот органдарының басты міндеті. Бұл орайда заң талаптарының қатаң орындалуы, ашықтық пен жариялылық – ең басты қағида.
Жемқорлықпен күрес тек жазалау шараларымен шектелмеуі тиіс. Оның алдын алу – әлдеқайда маңызды бағыт. Бұл – құқықтық сауаттылықты арттыру, азаматтық жауапкершілікті күшейту, жастарды адалдық пен әділдікке тәрбиелеу. Қоғамда жемқорлыққа төзбеушілік мәдениетін қалыптастырмайынша, бұл кеселден толық арылу мүмкін емес. Әрбір мемлекеттік қызметші өз ісіне адал болса, халықтың сенімі нығаяды, ал сенім бар жерде тұрақтылық пен өркендеу болады.
Жемқорлыққа қарсы күрес – тек мемлекеттік органдардың ғана емес, бүкіл қоғамның ортақ ісі. Біз бірлесіп, заңға мойынсұнуды өмір салтына айналдырып, әділдік пен адалдықты басты құндылық ретінде дәріптесек қана, бұл дерттен құтыла аламыз. Елдің жарқын болашағы, мемлекетіміздің тұрақты дамуы – адал еңбекте, әділдік пен парасаттылықта.
А.БЕКЖАНОВА,
Шымкент қаласының
қылмыстық істер жөніндегі мамандандырылған
ауданаралық сот әкімшісінің бас маманы.
