Түркістан облысы кәсіпкерлер палатасы «Қазақстанның үздіксіз білім беру қауымдастығы» жеке кәсіпкерлер мен заңды тұлғалар бірлестігінің (ҚАҮБҚ) сұранысы негізінде өңірдегі жекеменшік мектепке дейінгі ұйымдардың құрылтайшыларының құқықтарын қорғау мақсатында жекеменшік мектепке дейінгі ұйымдар, ҚАҮБҚ өкілдері және жергілікті атқарушы органдардың қатысуымен кеңес отырысын өткізді.
Мәселе – өңірлік білім басқармаларының барлық балабақшаларды, соның ішінде жекеменшік ұйымдарды да, полиция департаменттері жанындағы Оперативтік басқару орталықтарына (ОБО) қосуға міндеттеуі. Бұл талап ҚР Оқу-ағарту министрінің 2022 жылғы 30 наурыздағы №117 бұйрығына сәйкес енгізілуде.
Кәсіпкерлер көтеріп отырған негізгі мәселелер:
• Қаржылық ауыртпалық: Орнату, жабдықтау, қосылу және қызмет көрсету шығындары толықтай жекеменшік ұйым иелеріне жүктелуде. Бір жолғы шығын 1,5 млн теңгеге дейін, ай сайынғы төлем 70 000–200 000 теңге аралығында.
• Мемлекеттік қаржыландырудың жеткіліксіздігі: Жан басына шаққандағы қаржы бұл шығындарды өтемейді.
• Инфрақұрылым мәселелері: Көптеген ауылдық жерлерде интернеттің жоқтығынан ОБО жүйесі дабыл сигналдарына жедел жауап бере алмайды.
• Айыппұл қаупі: Қосылудан бас тартқан жағдайда 100 АЕК-ке дейін айыппұл салынатыны ескертілуде, өтемақы тетіктері қарастырылмаған.
Түркістан облысы кәсіпкерлер палатасы бұл жағдайдың кәсіпкерлердің еркін кәсіпкерлік құқығын шектейтінін және мемлекеттік тапсырысты орындау кезінде шығындарды әділ бөлу қағидаттарына қайшы келетінін атап өтті.
