Қазіргі таңда мемлекеттік қызметтерді цифрландыру – еліміздегі басты стратегиялық бағыттардың бірі. Бұл үрдіс әлеуметтік саладан да айналып өтпеді. Осыған орай, 2025 жылғы маусым айында Қазығұрт ауданында әлеуметтік қолдау жүйесін цифрлық форматқа көшіруге арналған оқыту семинары ұйымдастырылды. Ауқымды шара әлеуметтік қорғау саласын заманауи технологиялармен қамтамасыз ету арқылы халыққа көрсетілетін қызмет сапасын арттыруды, процестердің ашықтығы мен тиімділігін қамтамасыз етуді мақсат тұтты.
Семинар жұмысына Қазақстан Республикасының Мәдениет және ақпарат министрлігі жанынан құрылған «Отбасын қолдау орталықтарының қызметін жетілдіру жөніндегі жобалық кеңсенің» басшысы Сағындық Фарида және әлеуметтік қолдау шараларын цифрлық форматқа көшіру бойынша пилоттық жобаны іске асырып жатқан жобалық топ мүшелері қатысты. Жобалық кеңсе өкілдері семинар аясында тыңдаушыларға жаңа жүйелердің маңыздылығы мен артықшылықтары туралы жан-жақты түсінік берді.
Семинарға арнайы жұмыс сапарымен келген топ құрамында Түркістан облысының «Жұмыспен қамтуды үйлестіру және әлеуметтік бағдарламалар» басқармасы басшысының орынбасары Күміс Мирова да болды. Оның айтуынша, цифрландыру тек процестерді жеңілдетіп қана қоймай, азаматтарға көрсетілетін әлеуметтік қызметтерге деген сенімділікті арттырады, сонымен қатар адами фактордан туындайтын қателіктердің алдын алады.
Жиынды Қазығұрт ауданы әкімінің орынбасары Мадияр Оразалиев ашып, жүргізіп отырды. Ол өз сөзінде әлеуметтік қолдау жүйесінің тиімді жұмыс істеуі қоғам тұрақтылығының кепілі екенін айтып, цифрлық жүйелерді енгізу арқылы бұл бағыттағы қызметтердің жаңа деңгейге көтерілетінін атап өтті.
Оқыту семинарына аудандық полиция бөлімі, аудандық орталық аурухана мен емхана қызметкерлері, білім беру ұйымдарының директорлары мен тәрбие ісі жөніндегі орынбасарлары, әлеуметтік педагогтар, ауыл округтерінің әкімдері, сондай-ақ аудандық «Отбасын қолдау орталығы» КММ мамандары қатысты. Бұл семинар тек теориялық дәріс ретінде ғана емес, нақты тәжірибелік қадамдарды түсіндіретін, сала мамандарына арналған кәсіби бағыт-бағдар беретін алаң ретінде ұйымдастырылды.
Семинар барысында ҚР Еңбек және халықты әлеуметтік қорғау министрлігінің бастамасымен қолданысқа енгізіліп жатқан FSM Social ақпараттық жүйесі және Socium автоматтандырылған ақпараттық жүйесі (ААЖ) жайлы кең көлемде ақпарат берілді. Жаңа платформалар мемлекеттік қолдау көрсету тетіктерін автоматтандыру арқылы халықпен кері байланысты жақсартуға, деректерді нақты әрі жедел өңдеуге мүмкіндік береді. FSM Social жүйесі – отбасылық және әлеуметтік қолдау қызметтерін біріктіретін әмбебап жүйе болса, Socium ААЖ – жергілікті атқарушы органдар мен әлеуметтік саладағы ұйымдардың өзара тиімді әрекеттесуін қамтамасыз ететін заманауи құрал.
Одан бөлек, семинарда қатысушыларға мобильді қосымшалар арқылы қандай қызмет түрлерін алуға болатыны көрсетіліп, нақты жағдайларға мысал келтіріле отырып, жүйемен қалай жұмыс істеу керек екені тәжірибе жүзінде түсіндірілді. Жаңа технологиялардың енгізілуі мамандардың жұмысын жеңілдетіп қана қоймай, қызмет сапасын арттыруға және шешім қабылдау дәлдігін күшейтуге бағытталған. Бұрын қағаз жүзінде жүзеге асырылатын көптеген операциялар енді цифрлық жүйе арқылы бір терезе қағидаты негізінде орындалады.
Семинар соңында қатысушылар өздерін қызықтырған сұрақтарын қойып, мамандар тарапынан толыққанды жауаптар алды. Тәжірибе алмасу сәтінде сала қызметкерлері жүйеде кездесуі мүмкін қиындықтар мен оларды шешу жолдары туралы пікір алмасты. Қатысушылардың басым бөлігі семинардың өзектілігін, уақыт талабына сай ұйымдастырылғанын атап өтті.
Аталған оқыту семинары – Қазығұрт ауданындағы әлеуметтік қызмет көрсету саласын заманауи бағытта дамыту жолындағы маңызды қадам. Мұндай семинарлар алдағы уақытта да өз жалғасын тауып, бүкіл облыс аумағына кеңінен таралады деп күтілуде.
