Қытай Халық Республикасы Хэйлунцзян провинциясының вице-губернаторы Чжан Цисян Түркістан облысына арнайы іссапармен келді. Бұл сапар өңірдің өндірістік әлеуетін тереңірек зерттеу, инвестициялық жобалармен танысу және екіжақты экономикалық қарым-қатынасты дамыту мақсатында ұйымдастырылды.
Іссапар барысында Чжан Цисян және оның жетекшілік ететін делегациясы Түркістан облысының кәсіпкерлік және индустриалдық нысандарын аралады. Оған облыс әкімінің орынбасары Талғат Қозбеков серіктес болды. Қонақтарды «Түркістан әлеуметтік-кәсіпкерлік корпорациясы» АҚ Басқарма төрағасы Данияр Бектұрғанов қарсы алып, корпорацияның көкөніс сақтау қоймасының, шағын өндірістік паркінің мүмкіндіктері мен бүгінгі жетістіктері туралы жан-жақты мәлімет берді. Бұл нысандар өңірдің агроөнеркәсіптік кешенінің және шағын кәсіпкерліктің дамуында маңызды рөл атқарады.
Сапар аясында қонақтар бірнеше өндіріс орындарын аралап, олардың жұмысымен танысты. Бірінші болып, жаңбырлатып және тамшылатып суару жүйелерін шығаратын «BNK Group» өндіріс цехына барды. Бұл кәсіпорын су үнемдеу технологияларын пайдалана отырып, ауыл шаруашылығына қажетті заманауи суару жабдықтарын өндіреді. Мұндай технологиялар өңірдегі аграрлық сектордың өнімділігін арттыруға мүмкіндік береді.
Сонымен қатар, делегация мектептер мен медицина мекемелеріне арналған жиһаздар шығаратын «Aqniet Holding» компаниясының өндіріс орнында болды. Компанияның өндірістік қуаты, өнімдерінің сапасы және нарықтағы сұранысы жөнінде толық ақпарат алынды. Бұл кәсіпорын өңірдегі әлеуметтік инфрақұрылымды дамытуға өз үлесін қосып отыр.
Келесі нысан ретінде тоңазытқыш жабдықтарын өндіретін «Jasyl Suyq Qazaqstan» зауыты таңдалды. Мұнда заманауи технологиялар қолданылады және өнімдер еліміздегі ауыл шаруашылығы өнімдерін сақтау саласында маңызды рөл атқарады.
Сондай-ақ, жуырда іске қосылуы жоспарланған бейнебақылау камераларын өндіретін «Бір белдеу бір жол» кәсіпорнының өкілдерімен де пікірлесу өтті. Бұл компанияның өнімдері қауіпсіздік саласында үлкен сұранысқа ие болмақ және өңірдің технологиялық дамуында маңызды серпін береді.
Іс-сапардың соңында тараптар екіжақты әріптестікті нығайту мәселелерін талқылады. Қытайлық делегация Түркістан облысындағы өндіріс орындарындағы технологиялық деңгей мен өндірістік процестердің тиімділігін жоғары бағалап, болашақта инвестициялық ынтымақтастықты арттыруға мүдделі екендіктерін білдірді. Әріптестер арасында тәжірибе алмасу, өндірістік қуаттарды арттыру және жаңа жобаларды бірлесіп жүзеге асыру туралы ұсыныс-пікірлер ортаға салынды.
Осылайша, Хэйлунцзян провинциясының вице-губернаторының Түркістан облысына жасаған сапары өңірлер арасындағы экономикалық байланыстарды нығайтып, Қазақстан мен Қытай арасындағы стратегиялық серіктестікті дамытуға жаңа серпін берді. Бұл іс-шара болашақта өңірлік және халықаралық деңгейде ынтымақтастықты одан әрі тереңдетуге бағытталған маңызды қадам болып табылады.
