Түркістан облысы — еліміздің оңтүстік өңірлерінің бірі ретінде, соңғы жылдары инвестициялық климатты қалыптастырып, өндіріс саласын жаңа қарқынмен дамытуда. Бұл жетістіктер өңірдің экономикалық әлеуетін арттырып, өзге аймақтарға үлгі болуда. Аймақ басшысы Нұралхан Көшеровтің нақты тапсырмаларының арқасында, Түркістанға инвестиция тарту, өндіріс орындарын ашу және жаңа жұмыс орындарын құру бағытындағы жұмыстар қарқынды жүруде. Осындай белсенділіктің нәтижесінде Түркістан облысының даму тәжірибесіне еліміздің басқа аймақтары да қызығушылық танытуда.
Осы мақсатта өңіраралық тәжірибе алмасу аясында Түркістан облысына еліміздің басқа өңірлерінен делегациялар келеді. Соңғы сапар Маңғыстау облысының жұмыс тобының келуімен жалғасты. Маңғыстаулық делегация облыстың инвестициялық және туристік әлеуетімен танысып, өзара тиімді ынтымақтастықты арттыруға арналған ақпараттармен бөлісті. Делегацияны Маңғыстау облысы әкімінің орынбасары Асқар Қаныбеков бастап келді.
Жұмыс тобының екі күнге жоспарланған сапары Түркістан облысы әкімінің бірінші орынбасары Зұлпыхар Жолдасовпен кездесумен басталды. Кездесу барысында өңірлер арасындағы әріптестікті одан әрі нығайту, даму бағдарламаларын үйлестіру және инвестициялық жобаларды іске асыру мәселелері талқыланды. Бұл кездесуде екі облыс арасындағы байланыстардың әрі қарай дамуы үшін бірқатар нақты ұсыныстар мен жоспарлар айтылды.
Сапардың мәдени-тарихи бағдарламасы да ұйымдастырылды. Маңғыстаулық делегация Түркістанның тарихи-мәдени орталықтарына экскурсия жасап, «Ұлы дала елі» мұражайын аралап, Әзірет Сұлтан кесенесімен, сондай-ақ «Күлтөбе» ежелгі қалашығымен танысты. Бұл экскурсиялар аймақтың бай тарихы мен мәдени мұрасын көрсетіп, делегация мүшелерінде зор әсер қалдырды.
Активті іс-шаралардың екінші күні Маңғыстау облысының өкілдері «Turan» арнайы экономикалық аймағында болды. Мұнда арнайы экономикалық аймақтың жұмысымен танысып, өңірдегі инвестициялық мүмкіндіктер мен бизнес үшін жасалған қолдау мен жеңілдіктерді зерттеді. Сонымен қатар, шағын өндірістік парк аумағына барып, онда жұмыс істеп тұрған «Жасыл Суық Қазақстан» ЖШС, «Aqniet Holding» ЖШС, «BNK Group» ЖШС, «Daulet Holding» ЖШС және «Тұран Су» ЖШС сияқты кәсіпорындардың жұмыс барысын көріп, олардың тәжірибелерімен бөлісті.
Жұмыс тобы Ордабасы және Сайрам аудандарындағы өндіріс орындары мен жылыжайларға да барды. Онда өндірістік процестермен, жаңа технологиялармен танысып, жергілікті кәсіпкерлердің жетістіктері мен өндіріс саласындағы инновацияларды зерттеді. Бұл тәжірибе алмасу Маңғыстау облысының өкілдері үшін аса пайдалы болды, олар Түркістан облысының табысты тәжірибесін өз өңірлерінде қолдануға ниетті екенін білдірді.
Айта кетерлігі, Түркістан облысында негізгі инвестициялық алаңдар ретінде 15 индустриалды аймақ пен «TURAN» арнайы экономикалық аймағы бар. Бұл аймақтар кәсіпкерлерге әкімдік тарапынан жан-жақты қолдау көрсетіліп, әртүрлі салықтық және әкімшілік жеңілдіктер ұсынылады. Қазіргі таңда арнайы экономикалық аймақта 129 жоба жүзеге асырылуда, оның ішінде 95 жоба толық іске қосылған. Бұл көрсеткіштер өңірдің инвестициялық тартымдылығын және өндіріс саласындағы тұрақты дамуын айғақтайды.
Осылайша, Маңғыстау облысының делегациясының Түркістанға сапары өңірлер арасындағы өзара ынтымақтастықты нығайтуға, тәжірибе алмасуға және инвестициялық жобаларды бірлесіп жүзеге асыруға бағытталған маңызды қадам болып табылады. Бұл үрдіс Қазақстанның барлық өңірлерінде индустрия мен туризмді дамытып, елдің жалпы экономикалық әлеуетін арттыруға септігін тигізеді.
