Түркістан облысында білім беру саласын жетілдіру мақсатында қолға алынған «Жайлы мектеп» ұлттық жобасы аясында 29 жаңа мектептің құрылысы қарқынды жүргізілуде. Жалпы осы мектептер 22 900 оқушыға арналған орындарды қамтамасыз етеді деп жоспарланып отыр. 2024 жылы 13 мектептің құрылысы аяқталып, пайдалануға берілсе, 2025 жылы тағы 16 мектептің тапсыруы көзделген. Бұл жобаның мақсаты – өңірдегі білім сапасын арттыру, балалар мен жасөспірімдерге сапалы және қолайлы оқу ортасын құру.
Жақында облыс әкімдігінде осы жаңа білім ұяларының құрылысы мен оларды білікті кадрлармен қамтамасыз ету мәселелері бойынша арнайы жиын өтті. Жиынды Түркістан облысының әкімі Нұралхан Көшеров басқарды. Ол қатысушыларға нақты тапсырмалар мен талаптарды қойып, құрылыс пен кадрлық қамтамасыз етудің маңыздылығын атап өтті.
– Барлық жаңа мектептерді уақытылы әрі сапалы тапсыру керек. Құрылыс жұмыстарын аудан және қала әкімдері, сондай-ақ құрылыс басқармасының өкілдері тұрақты түрде бақылауда ұстауы тиіс. Мердігер ұйымдар өз міндеттерін жауапкершілікпен атқарсын, – деді әкім. – Екінші маңызды мәселе – бұл мектептерді білікті басшылармен, педагогтармен қамтамасыз ету. Бұл бағытта да жұмыс жүйелі әрі мұқият жүргізілуі қажет.
Жиында Облыстық құрылыс басқармасы басшысының міндетін уақытша атқарушы А.Тұрханов пен Облыстық білім басқармасы басшысының міндетін атқарушы А.Қасымбекова өз есебін таныстырды. Екі ведомствоның деректері бойынша, 29 мектептің инженерлік инфрақұрылым жүйелері толық қамтылған – газ, су, электр және байланыс желілері 100% тартылған. Қазіргі таңда 22 мектептің кірме жолдары салынған. Қалған 7 мектепте ауыр техникалардың жұмыстары аяқталған соң, кірме жолдарға асфальт төсеу жұмыстары жүргізіледі.
2024 жылы пайдалануға берілген 13 мектептің тоғызында оқу процесі өз жалғасын табуда. Қалған 4 мектепте оқу жылы осы жылдың қыркүйек айында басталады. 2025 жылы аяқталуы жоспарланған 16 мектептің 11-інде құрылыс жұмыстары 83%-ға орындалған, бұл – жоспарланған мерзімге сай жақсы көрсеткіш.
Қазіргі таңда жаңа «жайлы мектептерде» 736 педагог еңбек етуде. Білім беру ұйымдарына педагогтарды қабылдау туралы қолданыстағы нормаларға сәйкес 23 мектепке директорлар тағайындалды. Олардың ішінде 6 мектептің басшылары «Білім берудегі өзгерістің 1000 көшбасшысы» жобасының кадрлық резервінен іріктелген. 13 мектептің директорлары конкурстық тәртіппен, ал 4 мектептің басшылары ауысу тәртібімен бекітілген.
2025 жылы пайдалануға берілетін 16 мектептің 12-сіне директорлар тағайындалған. Қалған 4 мектептің 2-сінің басшылары конкурс кезеңінде, ал тағы 2 мектеп директоры ауысу тәртібімен тағайындалатын болады деп күтілуде.
Бұл жобаның жүзеге асуы облыстың білім беру саласында елеулі серпіліс әкеледі деп күтілуде. «Жайлы мектеп» жобасы – бұл тек жаңа оқу ғимараттарын салу ғана емес, сонымен қатар оқушылар мен педагогтардың қолайлы, қауіпсіз және заманауи білім алу ортасын қамтамасыз етуге бағытталған кешенді шара. Мұндай мектептерде балалар заманауи технологияларды қолдана отырып оқи алады, оқу процесі сапалы әрі тиімді болады.
Түркістан облысында білім саласын дамытуға бағытталған мемлекеттік бағдарламалардың бірі ретінде бұл жоба өңірдегі білім беру жүйесін жаңа деңгейге көтеруге мүмкіндік береді. Қала мен ауылдағы балаларға теңдей білім алу жағдайын жасау, кадрлық әлеуетті арттыру және оқыту сапасын жоғарылату – осының бәрі «Жайлы мектеп» жобасының басты мақсаттары.
Бұдан бөлек, жаңа мектептердің құрылысында экологиялық таза материалдар қолданылуда, балалар мен педагогтар үшін жайлы ауа алмасу, жарықтандыру жүйелері мен қауіпсіздік шаралары толық ескерілген. Бұл өз кезегінде оқу ортасының тиімділігі мен оқушылардың денсаулығын қорғауды қамтамасыз етеді.
Облыс әкімдігі аталған жобаны іске асыру барысында қоғамдық-саяси тұрақтылықты сақтау, жергілікті тұрғындардың жұмысқа орналасуына жағдай жасау және жергілікті кәсіпорындармен ынтымақтастықты арттыру бағыттарында да жұмыс жүргізуде.
Осылайша, Түркістан облысы білім беру саласындағы реформаларды іске асыруда аймақтық деңгейде үлгі боларлық жұмыстар атқаруда. «Жайлы мектеп» жобасы өңірдің жас ұрпағына сапалы білім мен жарқын болашақ кепілін береді.
