Түркістан облысы Қазығұрт ауданында орналасқан «Қазығұрт» индустриалды аймағы өңірлік экономиканы дамытуда және инвестиция тартуда айрықша орын алып келеді. Қазіргі таңда бұл аймақта жалпы құны 4,9 млрд теңгені құрайтын 8 инвестициялық жоба жүзеге асырылу үстінде. Аталған жобалар іске толық қосылғанда 249 жаңа жұмыс орны ашылады деп жоспарланған.
Бүгінде жалпы сомасы 2,2 млрд теңге болатын 4 жоба толық іске қосылып, нақты 123 адам тұрақты жұмыспен қамтылып отыр. Бұл – өңірдің өндірістік әлеуетінің артып келе жатқандығының айқын көрінісі. Сонымен қатар, бірқатар жаңа өндіріс нысандарының құрылысы жоспарға сай қарқынды түрде жүргізілуде.
ӨНДІРІС ОРТАЛЫҒЫНА АЙНАЛҒАН ҚАЗЫҒҰРТ:
Жуырда Түркістан облысы әкімінің орынбасары Талғат Қозбеков жұмыс сапарымен Қазығұрт ауданына барып, «Қазығұрт» индустриалды аймағында атқарылып жатқан жұмыстармен танысты. Жаңа жобалармен танысу барысында ол жауапты тұлғаларға инвесторлар тарту, өндіріс қуаттылығын арттыру, жобалардың сапалы әрі уақтылы орындалуын қамтамасыз ету жөнінде нақты тапсырмалар берді.
Қазіргі таңда «Билол» ЖК тарапынан 3 гектар аумақта болат шарларын өндіретін зауыттың құрылысы жүріп жатыр. Бұл өндіріс ошағы жылына 5000-6000 тонна өнім шығаруға қауқарлы. Құрылыс жұмыстары 80%-ға аяқталып, заманауи технологиялық жабдықтар орнатылуда.
2025 ЖЫЛЫ ІСКЕ ҚОСЫЛАТЫН ЖОБАЛАР:
Биылғы мамыр айынан бастап екі жаңа жоба бойынша құрылыс басталды:
— «TIMUR.LES» ЖШС – жиһаз, жұмсақ полиуретан көбігі және бағдарланған бөлшектер тақтасын өндіретін зауыт салып жатыр. Жылдық өндірістік қуаттылығы – 10 мың дана жиһаз.
— «AGRO irrigation» ЖШС – су үнемдеуге арналған полиэтилен құбырларын өндіретін зауыт құрылысын қолға алды. Инвестиция көлемі – 1,2 млрд теңге, қуаттылығы – жылына 10 000 тонна өнім. Бұл жоба ауыл шаруашылығын тиімді жүргізуге сеп болады.
Екі жобаның да жер телімдері рәсімделіп, құрылыс жұмыстары басталған. Инвесторлар жергілікті еңбек ресурсын тарту арқылы өңірдегі жұмыссыздықты азайтуға үлес қоспақ.
Сонымен қатар, «Сапа 2002» ЖШС 150 гектар аумаққа жаңбырлатып суғару жүйесін ендіру жұмыстарын бастап кетті. Бұл жоба ауыл шаруашылығы саласына жаңа технологияларды енгізуге мүмкіндік береді.
ІСКЕ ҚОСЫЛҒАН ӨНДІРІС ОРЫНДАРЫ:
«Қазығұрт» индустриалды аймағында қазіргі уақытта табысты жұмыс істеп жатқан бірнеше кәсіпорын бар. Атап айтқанда:
— «Көрік ШҚ» ЖШС – 2018 жылдан бастап алкогольсіз табиғи шырынды сусындар өндіреді. Кәсіпорынның жылдық қуаттылығы – 1000 тонна.
— «CG Foods Central Asia» ЖШС – 2019 жылдан бері тез әзірленетін тағамдарды өндіреді. Жылына 1100 тонна өнім шығарылады. Қазіргі таңда кәсіпорын өнімдерін Қазақстаннан бөлек, Ресей мен Орталық Азия елдеріне экспорттауда. Мұнда 100 адам тұрақты жұмыспен қамтылған.
— «Асыл су» ЖШС – автоматтандырылған ауыз су жүйесі және капсула өндірісін іске қосқан.
— «Сабит» шаруа қожалығы – «Ағанай» су қоймасына 200 мың шабақ жіберіп, балық өсірумен айналысуда.
Жалпы, Қазығұрт ауданындағы индустриалды аймақ облыстық инвестициялық саясаттың нақты жемісі ретінде бағалануда. Мемлекеттік қолдау мен жергілікті әкімдіктің үйлестіруімен жүзеге асып жатқан жобалар – аймақтың экономикалық тұрақтылығы мен халықтың әлеуметтік тұрмысын жақсартуға бағытталған.
Таяу жылдары «Қазығұрт» индустриалды аймағында тағы бірнеше жаңа жобалар жүзеге асырылып, жүздеген жаңа жұмыс орындары ашылады деп күтілуде. Бұл өз кезегінде өңірлік өндіріс қуатын арттырып, экспорттық әлеуетті кеңейтуге сеп болады.
