Түркістан облысы әкімінің орынбасары Нұрбол Тұрашбеков «Тұран су» мемлекеттік коммуналдық кәсіпорнының өндірістік-техникалық базасында болып, жұмыстың қазіргі жағдайын жан-жақты тексеріп, орындалған жұмыстардың барысын бақылады. Бұл сапардың мақсаты — мекеменің техникалық мүмкіндіктерін арттыру және оның жұмыс сапасын одан әрі жақсарту бағытындағы шараларды пысықтау болды.
«Тұран су» мекемесі суармалы жерлердің суарылуын қамтамасыз ететін каналдар мен арықтарды күтіп ұстау және жөндеу жұмыстарымен айналысады. Өндірістік-техникалық база жалпы 2 гектар аумақты алып жатыр және онда мекеме балансында тұрған арнайы техникаларға қызмет көрсету, жөндеу жұмыстарын жүргізу үшін барлық қажетті құрал-жабдықтар мен мамандар жұмыс істейді. Қазіргі таңда мекеменің теңгерімінде 81 арнайы техника бар, оның ішінде суару жүйелерін тазалау және жөндеу үшін пайдаланылатын су тазарту құралдары, экскаваторлар, грейдерлер мен тракторлар бар. Бұл техника облыстың суармалы жерлерінің жай-күйін тұрақты бақылауда ұстауға мүмкіндік береді.
Нұрбол Тұрашбеков сонымен қатар өндірістік базадағы параболалық лоток өндірісінің құрылысымен танысты. Бұл өндіріс орнында қажетті құрал-жабдықтар орнатылып, құрылыс жұмыстары аяқталуға жақын. Параболалық лотоктар арық-атыздарға орнатылады және олардың негізгі міндеті – ағын суды шаруаларға шығынсыз жеткізу. Бұл технология судың артық сарқылуын және таралуын болдырмай, шаруашылықтарда су ресурстарын үнемдеуді қамтамасыз етеді. Өндіріс іске қосылғанда тәулігіне 30 параболалық лоток шығарылатын болады, бұл облыстағы суармалы жерлердің инфрақұрылымын жақсартуға үлкен үлес қосады.
Сонымен қатар, облыс әкімінің орынбасары нысанды табиғи газбен қамтамасыз ету және шикізаттарды алу мәселелері бойынша бірқатар нақты тапсырмалар берді. Бұл шаралар өндірістің тұрақты және үзіліссіз жұмыс істеуіне мүмкіндік береді деп күтілуде.
Өткен жылы «Тұран су» мекемесі облыс бойынша 122,9 шақырым каналды механикалық тазалаудан өткізген болатын. Ал биылғы жылы бұл көрсеткіш 236,7 шақырымға жетіп, суару жүйелерін күтіп ұстаудағы жұмыстың көлемі екі есеге артқан. Бұл – өңірдегі суармалы жерлердің игерілуін арттыру және ауыл шаруашылығы өнімдерінің сапасы мен көлемін өсіру бағытында үлкен жетістік болып табылады.
Осылайша, «Тұран су» мекемесінің өндірістік-техникалық базасының дамуы мен техника паркінің жаңартылуы, сондай-ақ жаңа технологиялардың енгізілуі Түркістан облысының су ресурстарын тиімді пайдалану және ауыл шаруашылығы секторын дамытуға зор мүмкіндік береді. Бұл облыс әкімдігінің ауыл шаруашылығын қолдауға бағытталған жүйелі жұмыстарының бір көрінісі болып табылады.
