Түркістан қаласындағы «Атамекен» Ұлттық кәсіпкерлер палатасының өңірлік ғимаратында кәсіпкерлердің қатысуымен маңызды кездесу өтті. Түркістан облыстық мәслихатының және облыстық кәсіпкерлер палатасының Өңірлік кеңесінің төрағасы Нұралы Әбішов Түлкібас және Сайрам аудандарынан келген кәсіпкерлерді жеке қабылдап, олардың өзекті мәселелері мен ұсыныстарын тыңдады.
Жиынға Түркістан облысы әкімінің орынбасары Талғат Қозбеков, аудан әкімдіктерінің өкілдері, құқық қорғау органдары мен мемлекеттік мекемелердің жетекшілері, сондай-ақ Өңірлік кеңес мүшелері мен кәсіпкерлік субъектілерінің өкілдері қатысты. Бұл кездесудің басты мақсаты – кәсіпкерлерге ашық алаңда сөз беру арқылы, олардың бизнесті дамытуда кездесетін нақты қиындықтарын анықтап, бірлескен шешу жолдарын қарастыру болды.
Түлкібас ауданынан түскен ұсыныстар мен өтініштер:
Кездесу барысында Түлкібас ауданының кәсіпкерлері инфрақұрылым, субсидиялар, электр және газ тарифтері, сондай-ақ жеңілдетілген несиеге қол жеткізу жолындағы кедергілер туралы мәселелерді көтерді.
Мәселен, «Виола» шаруа қожалығының өкілі табиғи көл жағасында демалыс орнын ашуды жоспарлап отырғанын жеткізді. Ол жоба аясында инфрақұрылым – жол, жарық, су және интернетпен қамтамасыз ету қажеттігін айтып, қолдау сұрады. Ал «Rafe Com» қожалығы мал бордақылау алаңын салу үшін жер телімінің нысаналы мақсатын өзгерту қажеттігін көтерді. Бұл жоба аясында инвестиция тарту, жұмыс орындарын құру көзделуде.
«KazAgroVision» ЖШС-нің өкілі өндіріс көлемін ұлғайту үшін жеңілдетілген несиеге қол жеткізу жолдарын қарастыруды ұсынды. Алайда, бүгінгі таңда кәсіпкерлердің көпшілігі банктердің талаптарына сай болмауына байланысты қаржыландырудан шет қалып отыр. Осы орайда, кәсіпкер мемлекеттік қолдау тетіктерін жеңілдетуді сұрады.
Сайрам ауданынан айтылған мәселелер:
Сайрам ауданынан келген кәсіпкерлер де субсидия алу, инфрақұрылыммен қамту, кадр тапшылығы сияқты мәселелерді алға тартты. «Kuzov Karabulak» ЖШС кәсіпорнының өкілі зауыт ауқымын кеңейтуге байланысты 500-ге жуық дәнекерлеуші және токарь маманына сұраныс бар екенін мәлімдеді. Бұл мәселені шешу үшін ол жергілікті колледждермен бірлесе отырып, түлектерді өндіріс орындарына тарту қажет екенін айтты.
«Читилова» жеке кәсіпкерлігі 2025 жылы сүзбе мен ірімшік өндірісін кеңейтуді көздеп отыр. Осыған орай, ауыл шаруашылығы өнімдерін субсидиялау тетіктері туралы сұрақ қойылды. Ал «Қожақорған» ЖШС 100 гектар жерге су үнемдеу технологияларын енгізу үшін 191 кВт қуаттылықтағы трансформатор орнатуға рұқсат беруді сұрады. Бұл жоба ауыл шаруашылығындағы өнімділікті арттыруға сеп болмақ.
Шешу жолдары мен жауапты органдардың міндеттері:
Кәсіпкерлердің өтініш-ұсыныстарын мұқият тыңдаған Өңірлік кеңестің төрағасы Нұралы Әбішов әрбір мәселе хаттамаға енгізілетінін, назардан тыс қалмайтынын, әрі тиісті органдармен бірлесе шешілетінін мәлімдеді. Оның айтуынша, қазіргі таңда кәсіпкерлікті қолдау жүйесінде әлі де әкімшілік және бюрократиялық кедергілер бар, бұл өз кезегінде бизнесті дамытуға айтарлықтай кедергі келтіріп отыр.
«Жергілікті кәсіпкерлердің жұмыс істеуге деген ынтасы мен табандылығы жоғары. Бірақ, олардың дамуына кейде жүйесіздік, кейде салааралық үйлестіктің әлсіздігі кедергі келтіреді. Әрбір ұсыныс пен өтініш – нақты өмірлік жағдай. Сондықтан нақты шешімдер қабылданып, әр мәселе бойынша жүйелі жұмыс жүргізілуі тиіс», – деді Нұралы Әбішов.
Түркістан облысы кәсіпкерлер палатасының директоры Асылан Ибадуллаев та сөз сөйлеп, әрбір мәселенің маңыздылығын атап өтті. Ол палата тарапынан сүйемелдеу жұмыстары жүргізіліп, жауапты органдармен тұрақты байланыс қамтамасыз етілетінін айтты.
Қосымша мәселелер:
Кездесу барысында кәсіпкерлер палатасының Өңірлік кеңестері туралы Үлгілік ережеге енгізілетін өзгерістер, сондай-ақ өңірлік кеңестерді қалыптастыру және делегаттарды сайлау қағидалары да талқыланды. Бұл – кәсіпкерлердің басқару процестеріне белсенді қатысуын қамтамасыз ететін маңызды бастамалардың бірі.
Кездесу қорытындысында барлық ұсыныстар мен көтерілген мәселелер ресми хаттамаға енгізілді. Олар тиісті мемлекеттік органдар мен әкімдіктерге жолданып, нақты шешімдер қабылданатын болады. Әрбір кәсіпкерлік субъектісінің жобасы мен өтініші Кәсіпкерлер палатасы тарапынан бақылауға алынып, қажетті сүйемелдеу жұмыстары жалғасады.
