2025 жылғы Одақтас мемлекеттердің (Қазақстанды қоса алғанда) орталық оқиғасы Ұлы Отан соғысындағы Жеңістің 80 жылдығы болды. Фашизмді жеңуге әрбір республиканың өлшеусіз үлесі бар, ал ТМД аумағындағы әрбір отбасы бүгінгі таңда Отанын қорғауға шыққан, соғыс алаңынан оралмаған, тылдағы ерлікпен еңбек етіп, Ұлы Жеңісті жақындатқан адамдарды еске алуда.
Оқи отырыңыз...
Ұлы Жеңіс мерекесі бұрынғы Кеңес Одағы халықтарының жалпы тарихының маңызды бөлігі болып табылады, олар Ұлы Отан соғысы туралы тарихи естелікті сақтау және оны келесі ұрпақтарға жеткізу үшін бірікті.
ТМД мемлекеттерінің басшылар кеңесінің шешімімен 2025 жыл Ұлы Отан соғысындағы Жеңістің 80 жылдығы – нацизмге қарсы күресте Тыныштық пен Бірлік жылы деп жарияланды.
Бейбіт уақытта өмір сүріп жатқан ұрпақтардың, өз елінің бостандығы мен тәуелсіздігін қорғаған ардагерлерге алғыс белгісі ретінде, 2024 жылы ТМД мемлекеттерінің басшылар кеңесі «1941-1945 жылдардағы Ұлы Отан соғысындағы Жеңістің 80 жылдығы» атты бірлескен мерейтойлық медальді тағайындады.
Бұл – бәріміз үшін қасиетті, терең тарихы бар ерекше күн. Өйткені осы қиын жылдарда әкелеріміз бен аталарымыз ортақ мақсат – Ұлы Жеңіс үшін батылдық пен бірліктің үлгісін көрсетті. Соғыстың ауыр салдары әрбір қазақстандық отбасыға әсер етті. Сондықтан жеңімпаздар – соғыс ардагерлері мен тыл еңбеккерлерінің ержүрек ұрпағы туралы естелік Қазақстанның әр үйінде бүгінге дейін сақталып келеді.
Жақында Президент Қасым-Жомарт Тоқаев Қазақстан халқы Ассамблеясында: «Ұлы Жеңістің тағылымы барша халыққа, әсіресе, саясаткерлерге ксенофобияға, нәсілдік және ұлттық үстемдікке, халықаралық құқық қағидаттарын құрметтемеуге құрылған жауапкершіліктен жұрдай саясат жүргізудің салдары қандай қасіретке әкелетінін әлі күнге дейін көрсетіп отыр» деп ерекше атап өтті. Осыған байланысты Мемлекет басшысы БҰҰ Жарғысы мен халықаралық құқық қағидаттарын сақтау қажеттілігін үнемі атап көрсетіп келеді.
ҰОС ардагерлеріне біржолғы материалдық көмек беру жыл сайынғы дәстүрге айналды. Облыстардың, астананың және республикалық маңызы бар қалалардың жергілікті атқарушы органдарының ақпараты бойынша Жеңіс күнінің 80 жылдығын мерекелеу құрметіне биыл 120 ҰОС ардагерінің әрқайсысына 5 млн теңгеден біржолғы материалдық көмек көрсетілгенін БАҚ өкілдері жарыса жазды.
Президент атап өткендей, ең басты назар ардагерлерге бағытталады. «Ең бастысы, әрине, мемлекет пен қоғамның ерекше қорғауында болатын құрметті ардагерлерімізге айрықша көңіл бөлеміз», – деді ол. Сондай-ақ, бұл мерейтой ерлікке тағзым етудің, жас ұрпаққа батырлық пен елжандылықтың мәнін түсіндірудің маңызды кезеңі болмақ.
Ұлы Жеңіс – батырлар ерлігін еске алу ғана емес, бүгінгі ұрпаққа бағыт-бағдар болатын рухани тірек. Жеңісті ұмытпау – парызға адал, антқа берік болған қаһармандарымызды жадымызда сақтау, сол ерлікті ел санасына сіңіру деген сөз.
Қ.КЕМЕЛБЕКОВ,
Шымкент қаласы
қылмыстық істер жөніндегі
мамандандырылған ауданаралық соты әкімшісінің
сот приставы.
