Бурабайда өткен Ұлттық құрылтай елдің әлеуметтік-экономикалық дамуының жаңа кезеңін белгілеп берді. Бұл шара маңызды шешімдерімен ерекшеленіп, халықтың әл-ауқатын жақсарту, әлеуметтік әділеттілік және экономикадағы ашықтық мәселелеріне басты назар аударды. Президент өз сөзінде «Біз Ұлттық құрылтайдың отырыстарында әлеуметтік және мәдени-гуманитарлық мәселелерге қатысты маңызды шешімдер қабылдап, ел дамуының өзге бағыттары бойынша негізгі басымдықтарды анықтаймыз», – деді. Аймақтардың экономикалық дамуына жаңа мүмкіндіктер ашу және өңірлер арасындағы теңсіздікті жою – мемлекет үшін маңызды міндеттердің бірі. Бұл тұрғыда жастар мәселесі экономиканың дамуына серпін беретін фактор ретінде ерекше атап өтуге тұрарлық.
Еліміздің еңбек нарығын дамытуға арналған 2024-2029 жылдарға арналған тұжырымдаманың 10 айлық нәтижелері бойынша жұмыс іздеуші жастардың саны 459-ды құрады. Олардың арасында мемлекеттік бағдарламалар арқылы жұмысқа орналасқандар мен тұрақты жұмыс тапқан жастар да бар. Жастар әлеуметтік-демографиялық және экономикалық дамуда, сондай-ақ елдің бәсекеге қабілетті ортасын қалыптастыруда маңызды рөл атқарады. 2024 жылы «Дипломмен – ауылға!» бағдарламасы аясында 22 маманға 8 млн 122 мың теңге көлемінде көтерме жәрдемақы бөлінді, ал 10 жас маманға 79 млн 378 мың теңге көлемінде бюджеттік несие берілді. Бұл шаралар жастардың еңбекпен қамтылуын және кәсіпкерлігін әлеуметтік-экономикалық қолдауды көрсетеді. Президент Құрылтайда Үкімет әзірлеген жаңа салық реформасының маңыздылығына назар аударды. Бұл реформа әлеуметтік және экономикалық факторларды ескере отырып жүзеге асырылды, оның ішінде қосымша құн салығының мөлшерлемесін арттыру ұсынылды. Мұндай шара көптеген елдерде қабылданған, ал Қазақстан үшін бюджет тұрақтылығы мен әділ салық жүйесін қалыптастыруға бағытталған. Мемлекет басшысы әлеуметтік көмекті шын мәнінде мұқтаж адамдарға бағыттау қажеттігін атап өтті. Басым емес шығындарды қысқартып, бюджет қаражатын тиімді пайдалану – Үкіметтің басты міндеттерінің бірі. Сонымен қатар, өңірлік әкімдіктердің қарамағындағы әлеуметтік салықтан түсетін қаражат нақты әлеуметтік маңызы бар жобаларға жұмсалуы тиіс. Президенттің айтуынша, соңғы үш жылда елге 2 трлн теңгеден астам заңсыз алынған активтер қайтарылды, бұл қаражат әлеуметтік нысандар салуға жұмсалатын болады. Көкшетауда салынып жатқан жаңа көпфункционалды спорт кешені – осы бағыттағы нақты жобалардың бірі. Құрылтай шешімдерінің өңірлерде жүзеге асырылуы да қуантады.
Мектепте өткен дөңгелек үстелдер барысында жастарға арналған қолдау бағдарламалары мен салық заңнамасындағы жаңалықтар таныстырылды. Сонымен қатар, «мемлекет пен үкіметтік емес ұйымдардың ынтымақтастығын нығайту» тақырыбында азаматтық қоғам мен мемлекеттік органдар арасындағы өзара әрекеттестікті дамыту мәселелері талқыланды. Мұндай іс-шаралар қоғамдағы ашықтықты арттырып, сенімді күшейтеді. Мемлекеттің әлеуметтік саясатын жүзеге асырудағы нақты және тиімді әрекеттер елдің дамуындағы тұрақтылық пен әділеттілікті қамтамасыз етеді. Құрылтай еліміздің даму стратегиясын айқындайтын маңызды саяси алаңға айналды. Қабылданған шешімдер мен бастамалар ел болашағы үшін жасалған жаңа қадамдар екені уақытпен дәлелденеді.
Зира МАМЫТОВА,
№60 жалпы орта мектебінің мұғалімі.
