АСТАНА. KAZINFORM – Астана қаласының Райымбек батыр атындағы №50 мектеп-лицейінің бастауыш сынып мұғалімі Айгүл Ержанова Мысырда пауэрлифтинг спортынан өткен ашық әлем чемпионатында екі алтын медаль иеленді.
Фото: Астана қаласының Білім басқармасы
Мысыр астанасында өткен ашық біріншілікте елордалық ұстаз зілтемірді жерден іліп тік көтеру сайысында 100 келіні оңай бағындырып, рекорд тіркеді. Аталған жарысқа 23 мемлекеттен 2 000-ға жуық спортшы қатысты.
Фото: Астана қаласының Білім басқармасы
Айгүл Ержанова спорттың бұл түрімен 52 жасында кәсіби тұрғыда айналыса бастаған. Ал оған дейін қолкүреспен, жеңіл атлетикамен айналысқан.
— Қазақстан бұл жарысқа бірінші рет қатысып отырған соң мені ұйымдастырушылар басында қытайлық деп ойлапты. Кейін рекорд орнатқанымда Қазақстаннан келгенімді біліп, құрмет көрсетті, — дейді чемпион.
Айта кетейік, астаналық мұғалім былтыр «Қазақстанның еңбек сіңірген ұстазы» атағын алған.
Бапкері өзінің інісі — Айбар Ержанов. Ол ауыр атлетикадан әлем чемпионаты, Азия, Еуропа біріншіліктерінде жеңіске жеткен.
https://kaz.inform.kz/news/100-kel-zltemrd-enserd-elordalik-mugalm-54-zhasinda-alem-chempioni-boldi-b019b0/
